Դեսպան Աղաջանյանը առաջարկել էր «սատկացնել» «Սասնա Ծռեր» խմբի ապստամբներին

Օգոստոսի 24-ին Հայաստանի Հանրապետության նախագահ Արմեն Սարգսյանի հրամանագրով Ինդոնեզիայում ՀՀ դեսպան Ձյունիկ Աղաջանյանը համատեղության կարգով նշանակվել է Մալայզիայում Հայաստանի Հանրապետության արտակարգ և լիազոր դեսպան:

Փաստորեն ՀՀ ԱԳՆ-ն նոր իշխանությունների օրոք էլ չի պատրաստվում ազատվել այն պաշտոնյաներից, որոնք անմնացորդ ծառայել են նախորդ իշխանություններին:

Ձյունիկ Աղաջանյանի մասին մի քանի անգամ մամուլում գրվել է, որ ընդունող երկրներում բիզնես գործունեություն է ծավալում: Թերևս ՀՀ բոլոր դեսպաններն են իրենց ընդունող երկրներում բիզնեսներ վարում:

Աղաջանյանը հայտնի է նաև իր ծայրահեղական մոտեցումներով: 2016 թվականին, երբ «Սասնա Ծռեր» խումբը գրավել էր ՊՊԾ գունդը աշխարհի տարբեր երկրներում հայկական սփյուռքի ներկայացուցիչները ի պաշտպանություն նշյալ խմբի հավաքներ էին կազմակերպում իրենց երկրներում: Այդ օրերին ի աջակցություն «Սասնա Ծռեր» խմբի հավաքներ էին անցկացվում նաև Նիդերլանդների Թագավորությունում, որտեղ Հայաստանի դեսպանը Ձյունիկ Աղաջանյանն էր:

Այդ օրերի հավաքներին մասնակցող հոլանդահայերին առանձին առանձին իր մոտ է կանչել դեսպանը և պահանջել, որպեսզի այլևս նման հավաքների չմասնակցեն: Այս մասին ժամանակին գրել էր asparez.am լրատվականը: Հանդիպումներից մեկի ժամանակ Աղաջանյանը հայտարարել էր, որ «Սասնա Ծռեր» խմբի տղաները «ահաբեկիչներ» են ու «դրանց պետք է սատկացնեին» իշխանությունները:

Հետաքրքիր է, հիմա դեսպանը ինչպե՞ս է ներկայացնելու Հայաստանը դրսում, երբ իշխանության է եկել Նիկոլ Փաշինյանը, ում հիմա աջակցում են իր իսկ ձևակերպմամբ «ահաբեկիչները»:

Աղբյուր՝ Politik.am