Ռոբերտ Քոչարյանը եւս հինգ տարի կունենա գրասենյակ եւ գույք. գործադիրը որոշում կայացրեց

Կառավարությունը 5 տարով երկարաձգվելու է ՀՀ երկրորդ նախագահ Ռոբերտ Քոչարյանին Երեւան քաղաքում գրասենյակով ու գույքով ապահովելու 2008-ի մայիսի 22-ի որոշման ժամկետը: Այս մասին որոշումը կայացվեց կառավարության օգոստոսի 23-ի նիստին: Հարցը չզեկուցվողների թվում էր:

Որոշման մեջ ասված է. «Կառավարությունը որոշում է ՀՀ կառավարության 2008 թվականի հուլիսի 17-ի «Պաշտոնաթող նախագահ Ռոբերտ Քոչարյանին անհատույց օգտագործման իրավունքով Երեւան քաղաքում գրասենյակով ու գույքով ապահովելու» մասին որոշման եւ 2008-ի մայիսի 22-ի որոշման մեջ փոփոխություն կատարել, ըստ որի՝ «10 տարի ժամկետով» բառերը փոխարինել «15 տարի ժամկետով» բառերով»:

Այսպիսով՝ համաձայն որոշման, «ՀՀ նախագահի վարձատրության, սպասարկման եւ անվտանգության ապահովման մասին» ՀՀ օրենքի եւ ՀՀ կառավարության 2008 թվականի հուլիսի 17-ի որոշման հիմքով, «Էրեբունի-Պլազա» ՍՊԸ-ի եւ Հայաստանի Հանրապետության միջեւ 13.08.2008թ.-ին կնքվել է 374.1 քմ ընդհանուր մակերեսով տարածքի ենթավարձակալության պայմանագիր:

Նշված տարածքը եւ 17 586 280 ՀՀ դրամ սկզբնական արժեքով գրասենյակային գույքը մինչեւ 13.08.2018թ. ժամկետով անհատույց օգտագործման է հանձնվել ՀՀ պաշտոնաթող նախագահ Ռոբերտ Քոչարյանին:

Միաժամանակ, տարածքի վարձակալության համար յուրաքանչյուր տարի ՀՀ պետական բյուջեով ՀՀ կառավարությանն առընթեր պետական գույքի կառավարման վարչությանը («Պետական գույքի կառավարման կոմիտե») հատկացվել է 2000,0 հազ. դրամ:

Կոմիտեն տարածքի վարձատու «Էրեբունի-Պլազա» ՍՊԸ-ի հետ բանակցությունների արդյունքում ձեռք է բերել վերոնշյալ տարածքի վարձակալության պայմանագրի գործողության ժամկետը հինգ տարով եւ նույն պայմաններով երկարաձգելու մասին նախնական համաձայնություն:

«Ուստի, ի կատարումն ՀՀ վարչապետի հանձնարարականների, անհրաժեշտություն է առաջացել մշակելու եւ շրջանառության մեջ դնելու «Հայաստանի Հանրապետության կառավարության 2008 թվականի հուլիսի 17-ի որոշման մեջ փոփոխություններ կատարելու մասին» Հայաստանի Հանրապետության կառավարության որոշման նախագիծը»,- ասված է ՀՀ կառավարության որոշման մեջ: