Օգոստոսի 23-ին ՀՀ ոստիկանության զորքերի առաջին հերթափոխը կմեկնի Տավուշ
Օգոստոսի 23-ին ՀՀ ոստիկանության զորքերի առաջին հերթափոխը կմեկնի Տավուշի մարզ` մարտական դիրքերը պաշտպանելու, հայտնում է ՀՀ ոստիկանության մամուլի ծառայությունը:
Հերթափոխի հետ հանդիպել է ՀՀ ոստիկանության պետ Վալերի Օսիպյանը, ճշտել ոստիկանության զորքերի պատրաստվածության վիճակը:
«Ոստիկանության զորքերը առանձնանում են իրենց կարգապահությամբ, եւ այսօր ձեր ծառայությունից է նաեւ կախված ոստիկանության հեղինակությունը: Դուք ունեք տարիների փորձ, բավարար պատրաստվածություն, նաեւ այնպիսի հրամանատարներ, որ մարտական ուղի են անցել, եւ ավելի քան վստահ եմ, որ կարող եք պատվով կատարել ձեր առաջ դրված մարտական առաջադրանքը»,- ասել է ոստիկանության պետը:
Ավլի վաղ ՀՀ Զինված ուժերի գլխավոր շտաբի պետ Արտակ Դավթյանը հայտնել էր, որ ոստիկանության, պաշտպանության նախարարության համատեղ որոշումն է, որ ներքին զորքերի ստորաբաժանումները հերթափոխով սահմանին ծառայություն իրականացնեն:
«Ներքին զորքերը պատրաստված են, եթե կառավարության կողմից վերջնական որոշում լինի, կանցնեն նաեւ մարտական հերթապահություն իրականացնելու համար լրացուցիչ կուրսեր», մանրամասնել էր Արտակ Դավթյանը:
Հետևեք մեզ Facebook-ում