Դիվերսիոն փորձից հետո հակառակորդը կրել է կորուստներ, որոնք թաքցնում է․ Դավիթ Բաբայան

Ադրբեջանական կողմի գիշերվա դիվերսիոն փորձը ապրիլյան պատերազմից հետո հայկական կողմի վրա հարձակվելու հերթական անհաջող փորձն էր, որն, ինչպես նախորդները, որևէ արդյունք չեն տվել, պարզապես, գիշերային իր հարձակման փորձով հակառակորդը ևս մեկ անգամ ցույց տվեց ատելության բարձր աստիճան հայկական կողմի նկատմամբ։

Factor.am-ի հետ զրույցում նման տեսակետ հայտնեց Արցախի Հանրապետության նախագահի մամուլի խոսնակ Դավիթ Բաբայանն՝ անդրադառնալով այս գիշեր Արցախի ՊԲ դիրքերից մեկում հակառակորդի ձախողված հարձակման փորձին։

«Արտառոց ոչ մի բան տեղի չի ունեցել: Իրավիճակը շարունակում է մնալ վերահսկելի։ Հայկական կողմից թուլության որևէ դրսևորում կամ խուճապային տրամադրություն չկա և չի կարող լինել»,-նշեց խոսնակը։

Դավիթ Բաբայանը չբացառեց, որ ադրբեջանական կողմում դիվերսիոն փորձեր կատարելու ցանկություն առաջացրել են հայաստանյան ներքաղաքական զարգացումները, որոնք մշտապես գտնվում են հակառակորդի քաղաքական և ռազմաքաղաքական ղեկավարության ուշադրության կենտրոնում։

«Իհարկե՛, Ադրբեջանը հետևում է Արցախում և Հայաստանում ընթացող զարգացումներին, Ադրբեջանը երազում է, որ Հայաստանն ու Արցախը վատ վիճակում հայտնվեն, որ հարձակվի»,-ասաց նա։

Դավիթ Բաբայանը նաև հավելեց, որ, ըստ հայկական կողմի տեղեկատվության, հակառակորրդը գիշերվա հարձակումից կրել է կորուստներ, որոնք, սակայն, խնամքով թաքցնում է։

Հիշեցնենք, որ ավելի վաղ հայտնել ենք, որ այսօր՝ օգոստոսի 17-ին՝ ժամը 00:00-ի սահմաններում, հակառակորդի 15 հոգանոց խումբը հարձակման փորձ է ձեռնարկել ՊԲ հյուսիսային հատվածում տեղակայված մարտական դիրքերից մեկի ուղղությամբ:

ՊԲ դիրքապահ ստորաբաժանումները ժամանակին հավաստանշել են հակառակորդի նախահարձակ խմբի գործողությունները և վերջիններիս ետ շպրտել ելման դիրքեր:

Աղավնի Սուքիասյան