«Զաստավիտով» չի կարելի նվեր տալ. «թույլատրելի» և «անթույլատրելի» նվերները դատավորներին՝ պարզաբանում է նախարարը

ՀՀ Կառավարության այօրվա նիստում «Դատավորի կողմից ստացված թույլատրելի չհամարվող նվերը Հայաստանի Հանրապետությանը հանձնելու կարգը սահմանելու մասին» հարցը քննարկելիս ՀՀ վարչապետ Նիկոլ Փաշինյանի այն դիտարկմանը՝ որոնք են «թույլատրելի» և «անթույլատրելի» նվերները, որոնք կարող են ստանալ բարձրաստիճան պաշտոնյաները, քաղծառայողները և դատավորները, ՀՀ Արդարադատության նախարար Արտակ Զեյնալյանը պատասխանեց, որ կան չափորոշիչներ:

- «Նվեր հասկացությունը ենթադրում է ցանկացած գույքային առավելություն, որը ողջամտորեն չէր տրամադրվի դատավոր չhանդիսացող այլ անձին», այսպիսի ձևակերպում է, որը տալիս է առավելություն ավելի էժան ապրանքի կամ ծառայության, որը չէր տրամադրվի, իսկ «թույլատրելի» նվեր համարվում է այն նվերը, որը, սովորաբար, միջանձնային հարաբերություններում կարող էր տրամադրվել, եթե չլիներ դատավոր լինելու հանգամանքը: Անձը՝ դատավորը, պարտավոր է գնահատել, այն չի կարող լինել 100 հազար դրամից ավել (միանգամվա) կամ տարվա կտրվածքով 400 հազար դրամից ավել: Եթե ավել է, պետք է վերադարձվի, կամ եթե հնարավոր չէ վերադարձնել, այն պետք է փոխանցվի պետական գույքի կոմիտեին: - պարզաբանեց նախարարը:

Վարչապետն իր հերթին նշեց, որ հարցը հանրային իրազեկման կարիք ունի:

- Կմշակենք ծրագիր հանրայնացնելու համար սա, որ մարդիկ տեղյակ լինեն և ամբողջ բեռը չընկնի դատավորների վրա նվեր չընդունելու, այլ հասարակությունն էլ իմանա, որ դատավորին չի կարելի արգելված նվեր տալ, - հավելեց Արտակ Զեյնալյանը:

- «Զաստավիտով» չի կարելի նվեր տալ, - եզրափակեց Նիկոլ Փաշինյանը:

Zham.am