Տարոն Աճեմօղլուն հերքել է տեղեկությունները՝ թուրքական կառավարությունում ընդգրկվելու առաջարկի մասին

Հայտնի տնտեսագետ, պրոֆեսոր Տարոն Աճեմօղլուն հերքել է տեղեկությունները այն մասին, թե թուրքական կառավարությունում ընդգրկվելու առաջարկ է ստացել։ Cumhuriyet թերթի հետ զրույցում տնտեսագետն ասել է, որ դրանք ասեկոսեներ են, և ինքը նման առաջարկ չի ստացել։

Ավելի վաղ թուրքական մամուլում տեղեկություն էր տարածվել, որ հայտնի տնտեսագետը կստանձնի Թուրքիայի տնտեսության ղեկը։ Մասնավորապես, Habertürk թերթի սյունակագիր Նագեհան Ալչըն գրել էր, որ հավաստի աղբյուրների համաձայն՝ Աճեմօղլուն այն անձանցից է, որոնց հետ մտադիր է աշխատել վերընտրված նախագահ Ռեջեփ Թայիփ Էրդողանը։ Սյունակագիրը նշել էր, որ Աճեմօղլուն կարող է ստանձնել «պատմական առաքելություն՝ լուծելու Թուրքիայի տնտեսության կառուցվածքային խնդիրները»։

Հիշեցնենք, որ Նիկոլ Փաշինյանը տեղեկացրել էր, որ հեռախոսազրույց է ունեցել աշխարհահռչակ տնտեսագետ Տարոն Աճեմօղլուի հետ և վերջինս պատրաստակամություն էր հայտնել աջակցելու Հայաստանին՝ «տնտեսությունը վերականգնելու և զարգացնելու հարցում»։

Մայիսի 21-ին Աճեմօղլուն տեսակապի միջոցով մասնակցել է Հարավային Կալիֆոռնիայի համալսարանի Հայագիտության ինստիտուտում կայացած քննարկմանը, որը կրել է «Հայաստանը վաղը․ քաղաքացիական դիվանագիտությունը՝ գործողության մեջ» խորագիրը։

Անցած ամիս վարչապետ Նիկոլ Փաշինյանը և կառավարության մի շարք անդամներ տեսակոնֆերանս են անցկացրել Տարոն Աճեմօղլուի հետ՝ քննարկելով Հայաստանի զարգացման հեռանկարները և պրոֆեսոր Աճեմօղլուի հետ համագործակցության ձևաչափերը: