Ադրբեջանի գործողությունները ՀՀ սահմանին արհամարհանք են համանախագահող երկրների հանդեպ. Տիգրան Բալայան (տեսանյութ)
ՀՀ արտաքին գործերի նախարարության մամուլի խոսնակ Տիգրան Բալայանը Ադրբեջանի կողմից ՀՀ սահմանի Նախիջևանի հատվածում դիրքային ամրապնդման գործողությունները որակում է որպես արհամարհանք համանախագահ երկրների նկատմամբ: Պատասխանելով «Արմենպրես»-ի հարցին՝ ԱԳՆ խոսնակը նկատեց՝ նորություն չէ, որ Ադրբեջանը գործում է՝ ելնելով անպատասխանատվության սկզբունքից, իր իսկ կողմից ստանձնած պարտավորությունները չկատարելով: «Մենք շարունակաբար այս հարցը բարձրացնում ենք ինչպես համանախագահ երկրների, այնպես էլ մեր մյուս գործընկերների ու կազմակերպությունների առջև: Կարծում ենք՝ հենց այստեղ համանախագահները լուրջ անելիքներ ունեն, որովհետև չանսալով նրանց հորդորներին, անելով լրիվ հակառակը, դա առաջին հերթին արհամարհանք է համանախագահ երկրների համար»,-ասաց Տիգրան Բալայանը:
***
Հաշվի առնելով Թուրքիայի ներկայիս քաղաքական իրավիճակն ու նախընտրական հռետորաբանությունը՝ ՀՀ արտաքին գործերի նախարարության մամուլի խոսնակ Տիգրան Բալայանը հայ-թուրքական հարաբերություններում որևէ զարգացում չի ակնկալում: «Արմենպրես»-ի փոխանցմամբ՝ այս տեսակետն ԱԳՆ խոսնակը հնչեցրեց ի պատասխան հարցադրման, որ «Թուրքիայում նախագահական ընտրություններն ավարտվեցին, հայ-թուրքական հարաբերությունների հնարավոր կարգավորման գործընթացում կարող ենք որոշ տեղաշարժեր ակնկալել»:
Ինչ վերաբերում է հարցին, արդյոք Հայաստանը կշնորհավորի՞ Թուրքիայի նախագահ Ռեջեփ Թայիփ Էրդողանին վերընտրվելու կապակցությամբ, Տիգրան Բալայանն ասաց. «Մինչև 2014 թվականը Հայաստանի ու Թուրքիայի ղեկավարների միջև ֆորմալ շնորհավորանքներ էինք փոխանակվում ազգային տոների կապակցությամբ: Թուրքիայում Էրդողանի նախագահ դառնալուց հետո՝ 2014-ի օգոստոսից, ֆորմալ շնորհավորանքների պրակտիկան ևս դադարեց: Կարծում եմ՝ ես Ձեր հարցին պատասխանեցի»:
Հետևեք մեզ Facebook-ում