Նիկոլ Փաշինյան. Ցանցերի սեփականաշնորհման ոլորտում չպետք է ներգրավված լինեն օֆշորում գրանցված և իշխանության մոտ կանգնած ընկերություններ

Կառավարության այսօրվա նիստի սկզբում վարչապետ Նիկոլ Փաշինյանն անդրադարձավ «Բարձրավոլտ էլեկտրական ցանցեր» ընկերությունը «Տաշիր Գրուպին» հավատարմագրման կառավարման հանձնելու մասին պայմանագիրը չեղարկելու խնդրին:

Նա նշեց, որ ուզում է երկու նկատառում անել: «Առաջինը, մեր դիրքորոշումը հետևյալն է՝ էներգետիկ ոլորտի երկու հիմնական ցանցերը չպետք է լինեն նույն սեփականատիրոջ տիրապետության ներքո, և մենք պետք է առաջիկայում արագ որոշում կայացնենք ԲԷՑ հետագա կառավարման մեթոդի մասին: Մենք այս փուլում պետք է, այսպես ասած, վերջնական հայտարարություններ չանենք ընկերության կարգավիճակի մասին»,- ասաց նա:

Վարչապետը նշեց, որ պետք է որոշել՝ դա պետական կառավարման է մնում, թե որևէ մասնավոր կառավարման պետք է հանձնել:

«Մի բան կարող ենք այսօր հստակ հայտարարել՝ պետք է բացառենք, որ այդ մասնավորեցման կամ կառավարման գործընթացում ներգրավված լինի իշխանության հետ առնչություն ունեցող որևէ անհատ կամ ընկերություն: Բացառել, որ որևէ օֆշորային ընկերություն կարող է ներգրավված լինել այնտեղ: Բաց ու թափանցիկ մրցույթով պետք է արվի դա: Ասում եմ՝ երկու կարևոր նախապայման կա՝ օֆշոր չի լինելու, իշխանության հետ կապ ունեցող որևէ մարդ ու ընկերություն չի լինելու կառավարողը», -  ասաց նա:

Մանրամասները՝ տեսանյութում:

Zham.am