Իսրայելցի դիվանագետներն աշխատում են Լապշինին տեսակցելու ուղղությամբ

Իսրայելցի և ռուս դիվանագետներն աշխատում են Ալեքսանդր Լապշինին տեսակցելու ուղղությամբ, որը նախօրեին Բելառուսից արտահանձնվել է Ադրբեջան: Այդ մասին «ՌԻԱ Նովոստի»-ին հայտնեց Քնեսետի պատգամավոր Քսենիա Սվետլովան, որը մասնակցում է բլոգեր Լապշինին ազատելու պայքարին:

Ռուսաստանի և Իսրայելի քաղաքացիություն ունեցող Լապշինը Ադրբեջանում մեղադրվում է պետական սահմանի ապօրինի խախտման մեջ, նրան երկարատև ազատազրկում է սպառնում:

«Նրան արտահանձնում են ինչ-որ գերտեմպերով, և այս պահին, իսկ ես կապի մեջ եմ նրա կնոջ հետ, մենք անգամ չգիտենք, թե հստակ որտեղ է նա, և նրա մոտ դեռ թույլ չեն տալիս Իսրայելի հյուպատոսին», - ասաց Սվետլովան:

«Իսրայելական հյուպատոսությունն աշխատում է այդ ուղղությամբ։ Ես գիտեմ, որ նաև ՌԴ հյուպատոսությունն է փորձում հասնել նրա մոտ»,- հավելեց նա:

Հիշեցնենք՝ նախօրեին բլոգեր Ալեկսանդր Լապշինը հատուկ չվերթով Մինսկից տեղափոխվեց Բաքու:

«Ես շատ մտահոգված եմ նրա ճակատագրով: Երեկ նրան բոլորովին արտասովոր կերպով Բելառուսից տեղափոխեցին Ադրբեջան: Նրան ձեռնաշղթաներով տանում էին փակ դեմքերով հինգ մարդ: Ասես նա առնվազն Աբու Բաքր ալ-Բաղդադին էր («Իսլամական պետության» ղեկավարը): Իսկ խոսքն ընդամենը բլոգերի մասին է: Այս պահին մենք անգամ չգիտենք, թե որտեղ է նա հստակ, որ կառույցի մոտ, ով է նրան պահում: Այդ ամենը մեծ մտավախություններ են առաջացնում»,- ասաց Սվետլովան:

Zham.am