Անբացատրելի դեպք Գեղարքունիքի մարզում. Սուրբ Գրիգոր Լուսավորիչ եկեղեցու տարածքում գյուղացիները հայտնաբերել են Սովետի տարիներից «թաղված» 270-ից ավելի խաչքարեր ու տապանաքարեր

Արդեն մի քանի օր է, Գեղարքունիքի մարզի Ներքին Գետաշեն գյուղի բնակիչները՝ գյուղապետ Կարո Գևորգյանի գլխավորությամբ գյուղի կենտրոնում ԽՍՀՄ տարիներից հայտնի, սակայն կիսաավերված վիճակում գտնվող Սուրբ Գրիգոր Լուսավորիչ եկեղեցու տարածքում հայտնաբերել են 9-12-րդ դարերի 270-ից ավելի խաչքարեր ու տապանաքարեր։

Ֆոտոլրագրող Գագիկ Շամշյանի հետ զրույցում գյուղացիներն ասում էին. «Եկեղեցին կառուցվել է 1830-40-ական թվականներին՝ Արևմտյան Հայաստանի Ալաշկերտ գավառից մշտական բնակության եկած հայերի կողմից։ Եկեղեցին գործել է մինչև 1920 թվականները։ Դրանից հետո այն վերածվել է Կոլխոզմիության պահեստի։ Կանգում վիճակում մնացել է մինչև 1970-ականները, որից հետո սկսվել է փլուզվել։

Գյուղի բնակիչները որոշել էին նույն տեղում կառուցել եկեղեցի և այդ ժամանակ էլ հայտնաբերել են խաչքարեր ու տապանաքարեր, որոնց մասին նույնիսկ պատկերացում չունին։ Գտնվել են նաև 12 ժայռափոր խաչքարեր, որոնք էլ հիմք են ծառայել եկեղեցու կառուցման համար»։

Հայտնաբերված խաչքարերի և տապանաքարերի մասին Գեղարքունիքի մարզպետ Կարեն Բոթոյանն արդեն տեղեկացրել է համապատասխան կառույցներին, իսկ գյուղապետ Կ. Գևորգյանն էլ արդեն խոսել է ՀՀ մշակույթի նախարարության համապատասխան վարչության պատասխանատուների հետ, ովքեր խոստացել են, որ մի քանի օրվա ընթացքում կայցելեն գյուղ։

Գյուղացիները նշում էին նաև. «Հայտնաբերված խաչքարերի ու տապանաքարերի մասին, երբ իմացավ, մեր մարզպետը այցելեց գյուղ, տեղում ծանոթացավ իրավիճակին, ծոցատետրում ինչ-որ նշումներ կատարեց ու հայտնեց, որ պատկան մարմինները պետք է գիտական ուսումնասիրություն կատարեն՝ պարզելու համար անբացատրելի այս դեպքի առեղծվածը։ Եթե մարզպետն ու գյուղապետն օպերատիվորեն արձագանքեցին մեր կանչերին, ապա մյուս գերատեսչությունները խոստացել են, որ մի քանի օր անց կայցելեն»։

Հավանաբար մշակութի նախարարության չինովնիկներին այս օրերին ավելի շատ հետաքրքրում է ձվակռիվը՝ նկատի ունենալով Զատիկը, ու երևի Զատիկը հորով-մորով անելուց հետո նոր կբարեհաճեն գյուղ, մինչդեռ, եվրոպական երկրներում չինովնիկները առաջին իսկ վայրկյանից կինեին հայտնաբերված խաչքարերի վայրում։

Այստեղ են ասում մեր մշակույթի նախարարության որոշ չինովնիկներին՝ «աշխարհ կանգնի՛ր, իջնող կա»։

Ֆոտոլրագրողը հայտնում է նաև, որ գյուղում 3 տարուց ավելի է՝ գործում է Կոթա Սուրբ Աստվածածին եկեղեցին, որը կառուցել է Սյունյաց Գրիգոր Սուլթան Իշխանը և 3 տարի առաջ հիմնովին վերանորոգվել է գյուղապետ Կ. Գևորգյանի և իր համակիրների կողմից։ Կարդացեք Shamshyan.com -ում: