Ֆուտբոլում, ինչպես քաղաքականության մեջ. հասանք Եվրոպայի լիգայի հաջորդ փուլ, իսկ հետո ի՞նչ ենք անելու, անհայտ է

Ֆուտբոլի Հայաստանի չեմպիոն «Արարատ-Արմենիան» Եվրոպայի լիգայի խմբային փուլի առաջին տուրում ընդունեց Պրահայի «Սպարտային» ու պարտվեց խոշոր հաշվով. 1-4: 

Առաջին խաղակեսը չեխական թիմը հաղթեց 2։0 հաշվով։ Երկրորդ խաղակեսի սկզբում «Սպարտան» երրորդ գոլը խփեց։ Երկու րոպե անց «Արարատ-Արմենիայից» աչքի ընկավ 29-ամյա պորտուգալացի պաշտպան Բրունո Ուիլսոնը՝ խփելով հայկական թիմի առաջին գոլը խփեց Եվրոպայի լիգայում:
Մերոնք կարող էին զարգացնել հաջողությունն ու բեկել խաղի ընթացքը, երբ դրանից կարճ ժամանակ անց փոխարինման ելած Ֆրանսան տպավորիչ անհատական ճեղքումով ելավ հարվածային դիրք, սակայն գնդակը մի փոքր շեղությամբ անցավ դարպասաձողի «ոչ գոլային» կողքով: 
Իսկ 72-րդ րոպեին «Սպարտան» գեղեցիկ հարվածով ձևակերպեղ խաղի վերջնական հաշիվը՝ 4-1:
Պետք է նկատել, որ չնայած հաշվին, «Արարատ-Արմենիան» ամենևին էլ անօգնական կամ «բոքսի տանձիկի» տեսք չուներ: Հակառակը՝ թիմը պայքարում էր, ավելին՝ մերոնք ունեցան մի քանի, եթե ոչ 100 տոկոսանոց, ապա առնվազն 80-90 տոկոսանոց գոլային պահեր, որոնք սակայն չիրացրեցին: Իսկ մրցակիցն իրացրեց իր ստեղծած պահերի մոտ երեսուն տոկոսը: 
Ի՞նչ ցույց տվեց այս հանդիպումը:
 
Հիմնականը. «Արարատ-Արմենիայի» ռազմավարական անփութությունն ու անլրջությունը: Թիմը հասել է հայկական ակումբային ֆուտբոլի համար պատմական հաջողության. դուրս է եկել Եվրոպայի լիգայի խմբային փուլ: Եվ՝ ի՞նչ: Ունենալով որոշակի ժամանակ, թիմը ոչ մի կերպ չի ուժեղացրել իր և ոչ մի խաղային օղակ, ձեռք չի բերել ոչ մի նոր, ավելի ուժեղ խաղացող: Այնինչ ակնհայտ է, չէ՞, որ այստեղ մեկ-երկու աստիճան ավելի բարձր մակարդակ է: 
Ստացվում է, որ ֆուտբոլում մեր երկրում նույն վիճակն  ու մոտեցումներն են, ինչ քաղաքականության մեջ. հա, դուրս եկանք ԵԼ հաջորդ փուլ, բայց ի՛նչ ենք անելու դրանից հետո, անհայտ է: 
Միթե «Արարատ-Արմենիան» ԵԼ հաջորդ փուլ է դուրս եկել, որպեսզի խոշոր հաշվով պարտություններ գրանցի: 

Հավելենք միայն, որ այս մրցաշարի երկրորդ տուրում «Արարատ-Արմենիան» հոկտեմբերի 15-ին կհյուրընկալվի լեհական «Յագելոնիային»։ Մոտ մեկ ամիս ժամանակ ունեն՝ խելքը գլխին հետևություններ անելու համար: Հաջողություն ենք մաղթում հայկական ակումբին: