Մարզիչներն աշխատավարձ չեն ստանում, իսկ երեխաները դրսում են մարզվում.«Մուլտի Գրուպ»-ի աշխատակիցները կրկին ակցիա են անում

«Մեզ թույլ տան աշխատենք, մինչև հարցի լուծումը կգտնեն։ Հիմա երեխաների կեսը դրսում են մարզվում, կեսը՝ բակում, մյուսներն էլ՝ այլ ակումբների հետ համագործակցելով։ Նրանք, ովքեր պատրաստվում են Աշխարհի և Եվրոպայի առաջնություններին, փորձում են գոնե ինչ-որ տեղ մարզվել, թեկուզ՝ դրսում»,- բողոքի ակցիայի ժամանակ ասաց «Մուլտի Գրուպ» ընկերության աշխատակիցներից մեկը՝ ընդգծելով, որ ստեղծված իրավիճակը լուրջ հետևանքներ է թողել մարզական գործընթացի վրա։

Նրա խոսքով՝ արդեն մեկ ամիս է մարզիչները չեն ստանում աշխատավարձ, մինչդեռ մարզիկները շարունակում են պատրաստվել միջազգային կարևոր մրցաշարերի, սակայն զրկված են նորմալ մարզումների հնարավորությունից։

«Փորձում ենք դրսում մարզումներ անցկացնել, բայց դա լուծում չէ։ Թույլ տան աշխատել, թույլ տան, որ մեր հավաքականները և մարզաբազաները գործեն, մինչև հարցի վերջնական լուծումը գտնեն»,- ասաց նա։

Անդրադառնալով պատճառված վնասներին՝ աշխատակիցը նշեց, որ դրանց իրական ծավալը հնարավոր կլինի գնահատել միայն համալիրի վերաբացումից հետո։

Նա նաև տեղեկացրեց, որ «Մուլտի Գրուպ»-ն արտերկրից ուսումնամարզական հավաքների համար հյուրեր ընդունելու պայմանագրեր ուներ։ Նրա խոսքով՝ այս ժամանակահատվածում ամեն օր տարբեր երկրներից թիմեր էին ժամանում, հատկապես լողավազանի մարզաբազան մշտապես հյուրընկալում էր հավաքներ, սակայն այժմ այդ ծրագրերը խաթարվել են։

Աշխատակիցը հավելեց, որ լողավազանում առկա մեծ քանակությամբ ջուրը փչացել է և պետք է ամբողջությամբ փոխվի, քանի որ քրեական վարույթի շրջանակում արգելված է մուտք գործել տարածք։

«Շատ մրցաշարեր ունենք, որոնք արդեն հետաձգվել են։ Մինչև այս ամսվա 24-ը նախատեսված մրցաշար էլ ունեինք, որը չենք անցկացնելու։ Ամեն ինչ հետաձգվել է, և ոչ մի մրցաշարի չենք կարող մասնակցել, որովհետև պարզապես պատրաստ չենք եղել»,- ասաց նա։
Աղբյուրը` Panorama.am