Այլևս ոչ թե՝ ԵՊՀ, այլ փաշինյանական «գուլա՞գ». վաստակաշատ դասախոսին ազատել են աշխատանքից, բացառապես քաղաքական պատճառներով

Ցանկացած քայքայում քայքայողներն սկսում են հիմքերից: Արցախյան շարժումն ու այդ շարժման պատմաքաղաքական հետևանքները ոչնչացնելու նպատակով իշխանության բերված խմբակը չէր կարող ավերածություններ չգործել Երևանի պետական համալսարանում: Նախ, Փաշինյանն անձնական մուռ ուներ ԵՊՀ-ի դեմ, որտեղից նրան դուրս էին հանել: Երկրորդը՝ բռնատիրական ռեժիմին ոչ մի պարագայում պետք չէ քիչ թե շատ ազատամտություն դրսևորող որևէ օջախ: Երրորդ. 88-ի Արցախյան շարժման ժամանակ ԵՊՀ-ի դասախոսները և ուսանողությունը կարևոր դերակատար են եղել: 
Ըստ որում, նույնիսկ խորհրդային «բռնատիրության» շրջանում ԵՊՀ-ն, անգամ համալսարանի կոմկուսի ներկայացուցիչները բազմապատիկ ավելի լայնախոհ էին ու անհամեմատելի ազգային մտածողություն ունեին, քան քպ-ականների ամբողջ խմբակը, միասին վերցրած, իրենց կուսակցապետով հանդերձ: 
Այժմ այնպիսի տպավորություն է, որ Երևանի պետական համալսարանը, երբեմնի ազատամտության կղզյակը վերածվել է դարչնագույն «գուլագի»: Այստեղ կարող են լուծարել մի ամբողջ ամբիոն, քանի որ ամբիոնի վարիչը ընդդիմադիր հայացքներ ունի: Դե, իսկ բացառապես քաղաքական պատճառներով դասախոսներին աշխատանքից ազատելը արդեն ԵՊՀ «այցեքարտն» է դարձել: 
Ահավասիկ, թարմ փաստ. 

«Ժողովուրդ» օրաթերթի աղբյուրները փոխանցում են, որ սեպտեմբերի 1-ից ԵՊՀ իրավագիտության ֆակուլտետի նախկին դեկան, ՀՀ արդարադատության խորհրդի նախկին անդամ Գագիկ Ղազինյանը կազատվի Երևանի պետական համալսարանի դասախոսի աշխատանքից։

Հուլիսի 7-ին Ղազինյանին տեղեկացրել են, որ համալսարանը նրա հետ այլևս չի շարունակելու աշխատանքային պայմանագիրը։

Հիշեցնենք, որ Գագիկ Ղազինյանի որդիները՝ Արթուր Ղազինյանն ու Դավիթ Ղազինյանը ընդդիմադիրներ են։ Արթուր Ղազինյանն անցած խորհրդարանական ընտրություններին պատգամավոր էր ընտրվել «Հայաստան» դաշինքի կազմում, Դավիթ Ղազինյանը «Ուժեղ Հայաստան» կուսակցության խորհրդի անդամ է, նա այդ ուժի ընտրական ցուցակով ընտրվել է ԱԺ պատգամավոր։

Սա առաջին դեպքը չէ, երբ ԵՊՀ-ն քաղաքական հայացքների համար դասախոսներին հեռացնում է աշխատանքից։
--
Իսկ ի՞նչ է լինելու հաջորդիվ: Նիկոլ Փաշինյանի առաջ ,պատկերավոր ասած՝ բերանքսիվայր փռված ԵՊՀ «ղեկավարության» ցուցումով համալսարանի առաջ խարույկի վրա այրելու են հայոց պատմության վերաբերյալ աշխատություննե՞րը: