1 շիշ օղի, 4 տուփ պանիր, 3 հատ երշիկ․ ի՞նչ է նվիրել Մոսկվան Փաշինյանին

Փաշինյանի ապրիլմեկյան այցը Ռուսաստանի Դաշնություն թերևս կարելի է համարել արգասաբեր, սակայն, ցավոք, ոչ թե ռազմավարական կամ քաղաքական ձեռքբերումների, այլ սոսկ սննդի ապահովման տեսանկյունից։ Այն փուլում, երբ երկիրը կանգնած է անվտանգային լրջագույն մարտահրավերների առաջ, Մոսկվայից բերված հիմնական արդյունքը դառնում է երշիկի, պանրի և օղու տեսականին։

Միջազգային դիվանագիտության պատմության մեջ հազվադեպ է պատահում, որ պետության ղեկավարին պաշտոնական կամ աշխատանքային այցերի ընթացքում որպես հիմնական հուշանվեր մատուցվի սննդամթերքի հավաքածու։

Այսպիսով՝ ՌԴ նախագահի աշխատակազմի և արարողակարգի ղեկավարի կողմից փոխանցված այդ յուրօրինակ հումանիտար փաթեթը եղել է հատուկ փայտե տուփով, որի պարունակությունն ու արժեքն արդեն պաշտոնապես արձանագրված են Փաշինյանի հայտարարագրում։

Ըստ այդմ՝ Մոսկվան նրան է նվիրել 336,500 ՀՀ դրամի ընդհանուր արժեքով ալկոհոլային խմիչքներ՝ 3 շիշ գինի, 1 շիշ օղի և 1 շիշ կոնյակ, 4 տուփ պանրի տեսականի, 3 հատ երշիկի տեսականի, 1 հատ պաշտետ, ծովամթերք՝ 3 տուփ ծխեցված ձուկ, 1 տարա կրաբի ձողիկներ, ինչպես նաև 1-ական տարա կարմիր և սև ձկնկիթ։

Այս պարագայում սննդի հավաքածուի նման ընտրությունը կարող է ունենալ ենթատեքստ։ Հաշվի առնելով Նիկոլ Փաշինյանի սերը սնվելու հանդեպ, սոցիալական հարթակներում սնվելու դրվագների հրապարակումները (ավտոբուսում, խանութներում, դրսում, տանը), հնարավոր է, որ արտաքին գործընկերները որոշել են քաղաքական երկխոսությունը տեղափոխել ավելի պարզ՝ կենցաղային կամ ստամոքսային հարթություն։

Արդյունքում՝ պետականության խորհրդանիշ հանդիսացող ավանդական հուշամեդալի, արժեքավոր կտավի կամ որևէ այլ մշակութային հուշանվերի փոխարեն Հայաստանի ղեկավարին մատուցել են երշիկ, պանիր ու ալկոհոլային խմիչք։ Այս համեղ փաթեթը ողջամիտ հարցեր է առաջացնում այն մասին, թե ինչպես է ընկալվում Հայաստանի քաղաքական ղեկավարությունը դրսում։ Երբ պետության առաջնորդին ավելի շատ տեսնում են սնվելիս, ապա դիվանագիտական նվերներն էլ դառնում են ձկնկիթ, ձողիկ, երշիկ, պանիր ու խմիչք։

Աղբյուրը՝ oragir.news