Էջմիածինը չընդունեց Նիկոլ Փաշինյանին

«Հրապարակը» գրում է. «Հայ Առաքելական եկեղեցու դեմ Նիկոլ Փաշինյանի և նրա կուսակիցների արշավանքից հետո «Քաղաքացիական պայմանագիրն» Էջմիածնում զգալի ընտրազանգված կորցրեց։ Քաղաքի բնակիչները դրա պատասխանը տվեցին դեռևս 2025 թվականին՝ Վաղարշապատի համայնքապետի արտահերթ ընտրությանը՝ մերժելով ՔՊ-ի թեկնածու Արգիշտի Մեխակյանին։ Վերջինս համայնքապետի պաշտոնում ընտրվեց շնորհիվ Խոյ համայնքի եւ գյուղական բնակավայրերի, որոնք խոշորացման արդյունքում արհեստականորեն միացվել էին Էջմիածնին՝ հստակ դիտավորությամբ։

ՔՊ-ն ու նրա առաջնորդը էջմիածնեցու արհամարհանքին արժանացան նաև այսօր՝ չցանկանալով մասնակցել Փաշինյանի հետ հանդիպմանը։ ՏԿԵ նախարարի ու Արմավիրի մարզպետի մակարդակով չնայած ամեն ինչ արվել էր՝ հոգևոր մայրաքաղաքում բազմամարդ հավաք ստանալու համար, անգամ գյուղերից էին մարդիկ բերել, բայց քաղաքի ամենափոքր հրապարակն անգամ չլցվեց։
Իսկ հրապարակ ասվածը Կոմիտասի անվան մշակույթի պալատին հարակից հարթակն է, որն ամենամարդաշատ հանրահավաքների ժամանակ անգամ 300 մարդը չի գերազանցում։ Համայնքի ղեկավարությունը թեև կարող էր քաղաքի ամենամեծ՝ Կոմիտասի հրապարակը նախատեսել հանդիպման համար, կամ թեկուզ «Անմար կրակի» տարածքը, որն իր չափերով ավելի մեծ է մշակույթի պալատի բաց հարթակից, բայց նախապատվությունը տվել էր ամենափոքրին՝ լավ հասկանալով, որ դա էլ լցնել չի կարող։
Պաշտոնյաների մտավախությունն իզուր չէր․եթե չլինեին Փաշինյանին ուղեկցողներն ու պետական պաշտոններ զբաղեցնողները, հրապարակում հազիվ էլ մեկ-երկու տասնյակից ավելի մարդ լիներ։ Եղածներն էլ՝ տարեց կին ու տղամարդ են, որոնցից մի քանիսը եկել էին Փաշինյանին հաճոյանալու հատուկ առաքելությամբ։ Դատելով բոլոր մարզերում կրկնվող՝ Նիկոլին շոշափելու, գրկելու, սեր խոստովանելու տեսարաններից, դժվար չէ ենթադրել, որ տեղի ունեցողն ընդամենը էժանագին բեմադրություն է՝ հատուկ հեռուստադիտողի համար։

ՀԱԵ դեմ գրոհը վերջին կաթիլն էր՝ իշխող կուսակցության դեմ էջմիածինցիների ցասումի։ Քաղաքը Նիկոլի կառավարությանը չի ներում հատկապես 44-օրյա պատերազմի ժամանակ «Քիմիկների զորամասի» զինվորներին կռիվ տանելու և «փուռը» տալու համար։ Չի ներում էջմիածինցիների ընտրությունը խեղաթյուրելու և հազարամյա պատմություն ու ավանդույթներ ունեցող քաղաքը գյուղացիների տնօրինությանը հանձնելու համար։ Չի ներում քաղաքի միակ հիվանդանոցը հիմնանորոգման նպատակով քանդելու և քանդած թողելու համար: Եւ հատկապես չի ներում եկեղեցու դեմ արշավանքի համար:

Էջմիածինն իր ընտրությունն արել է դեռևս 2025 թվականին․ՔՊ-ին մերժել է թե՛ այն ժամանակ, թե՝ հիմա»։