Կառավարության նիստում հաստատվել է...

Կառավարության այսօրվա նիստում հաստատվել են ՀՀ բարձրագույն ուսումնական հաստատությունների 2026-2027 ուսումնական տարվա՝ ըստ մասնագիտությունների պետության կողմից ուսանողական նպաստների ձևով ուսման վարձի լրիվ փոխհատուցմամբ և վճարովի, առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունելության տեղերը: Այդ մասին հայտնում են ԿԳՄՍՆ-ից:

Ընդհանուր առմամբ՝ 2026-2027 ուստարվա՝ պետության կողմից ուսանողական նպաստների ձևով ուսման վարձի լրիվ փոխհատուցմամբ առկա ուսուցմամբ, բակալավրի ու անընդհատ և ինտեգրացված կրթական ծրագրով ընդունելությանը կհատկացվի 2921 տեղ, որից 2109-ը՝ ՀՀ բուհերին: Ընդ որում՝ 2109 տեղից 1282-ը (որը կազմում է ընդհանուր տեղերի թվի շուրջ 61%-ը) նախատեսված է բնագիտամաթեմատիկական (STEM) ոլորտի կրթական ծրագրերի համար (2025-2026 ուստարում STEM ոլորտին հատկացվել ընդհանուր տեղերի 60%-ը):

Ազգային փոքրամասնությունների համայնքներին հասանելի, ներառական և որակյալ կրթական գործընթացի շարունակականության ապահովման նպատակով ՀՀ Կառավարության 2021-2026 թթ. գործունեության միջոցառումների ծրագրով նախատեսված է բարձրագույն կրթության բակալավրի կրթական աստիճանով (այդ թվում՝ անընդհատ ու ինտեգրացված կրթական ծրագրերով) յուրաքանչյուր տարի առկա ուսուցման մինչև 7 անվճար տեղ հատկացնել՝ ազգային փոքրամասնությունների համայնքների ներկայացուցիչների ընդունելության համար:

Պաշտպանության նախարարության ներկայացրած հայտով Վ. Սարգսյանի անվան ռազմական ակադեմիային կտրամադրվի 309 տեղ, «Պատիվ ունեմ» ծրագրով ընդունելության համար նախատեսվել է 273 տեղ:

Ինչպես 2025-2026, այնպես էլ 2026-2027 ուստարիների համար ՀՀ բուհերին հատկացվել են նպատակային ուսուցման համար պետության կողմից լրիվ փոխհատուցմամբ տեղեր, մասնավորապես՝ Մ. Հերացու անվան պետական համալսարանին՝ 47 տեղ (Առողջապահության նախարարության առաջարկով Արմավիրի, Արարատի, Արագածոտնի, Շիրակի, Գեղարքունիքի, Լոռու, Վայոց ձորի, Տավուշի և Սյունիքի մարզերի դիմորդների համար՝ 5-ական տեղեր, Կոտայքի մարզի դիմորդների համար` 2 տեղ), Կոմիտասի անվան կոնսերվատորիային՝ 1 տեղ, Երևանի թատրոնի և կինոյի ինստիտուտին՝ 10 տեղ:

Հաշվի առնելով 2025-2026 ընդունելության մրցույթի արդյունքները և թափուր մնացած տեղերի վերլուծությունը՝ նախատեսվում է 2026-2027 ուստարվա համար ըստ մասնագիտությունների առկա ուսուցմամբ բակալավրի ու անընդհատ և ինտեգրացված կրթական ծրագրերով 11 000 վճարովի ընդունելության տեղ, որոնք կբաշխվեն բուհերի ներկայացրած հայտերին համապատասխան՝ տվյալ մասնագիտությանը լիցենզիայով հատկացված տեղերի շրջանակում:

Նշենք՝ միասնական քննությունների հայտագրման, քննությունների անցկացման երկրորդ և մասնագիտության հայտագրման առաջին փուլն ընդգրկում է տվյալ տարվա ապրիլի 15-ից մինչև մայիսի 10-ն ընկած ժամանակահատվածում դիմորդների կողմից մասնագիտության և տվյալ մասնագիտության համար սահմանված (հանձնած կամ հանձնվող) քննական առարկաների առցանց հայտագրումը (dimord.am կայքում), ինչպես նաև տվյալ տարվա հունիսին դիմորդների կողմից միասնական քննությունների հանձնումը։