Իրանը սպառում է ԱՄՆ-ի և դաշնակիցների հրթիռային պաշարները՝ էժանագին ԱԹՍ-ներ օգտագործելով․ The New York Times

Իրանը հաջողությամբ դատարկում է ԱՄՆ-ի և նրա դաշնակիցների թանկարժեք հրթիռների պաշարները՝ էժանագին անօդաչու թռչող սարքեր օգտագործելով։ Այս մասին գրում է The New York Times-ը։

Ըստ ԱԹՍ-ներ արտադրող «Hylio» ընկերության գլխավոր տնօրեն Արթուր Էրիկսոնի՝ մեկ թիրախի խոցման համար կատարվող ծախսերի հարաբերակցությունը 60-70/1 է՝ հօգուտ Իրանի։ Սա նշանակում է, որ իրանական կողմը չնչին գումարներ է ծախսում այնպիսի հարձակումների վրա, որոնց չեզոքացումը դաշնակիցներից տասնյակ անգամ ավելի մեծ ռեսուրսներ է խլում։

Նշվում է, որ Իրանի հետ պատերազմի մեկնարկից ի վեր ամերիկյան զինուժի բարձր ճշգրտության զինատեսակների, ինչպես նաև ՀՕՊ և ՀՀՊ կալանիչ հրթիռների պաշարներն արագորեն սպառվում են: Ամերիկացի պաշտոնյաները մտահոգություն ունեն, որ այդ միջոցների օգտագործման տեմպերն այնքան բարձր են, որ հաշված օրեր անց ստիպված կլինեն ընտրություն կատարել, թե որ սպառնալիքների չեզոքացմանն առաջնահերթություն տալ:

Ռազմավարական և միջազգային հետազոտությունների կենտրոնի (CSIS) զեկույցի համաձայն՝ ԱՄՆ-ը վերջերս սահմանափակ քանակությամբ կալանիչ հրթիռներ է ձեռք բերել (հարյուրներով, այլ ոչ թե հազարներով): Չնայած նոր պայմանագրերի ստորագրմանը՝ գործարաններից տարիներ կպահանջվեն ակտիվ հակամարտության պայմաններում կտրուկ աճած պահանջարկը բավարարելու համար: