Զինվորական ծառայությունից ազատվելու նոր համակարգ կգործի բարձր վարկանիշային բուհերի սովորողների համար

Ըստ այդմ՝ Շանհայի վարկանիշավորման ցանկի http://www.shanghairanking.com առաջին հինգ տասնյակում ընդգրկված բուհերում ուսումնառության հիմքով տարկետում ստացած քաղաքացիները հնարավորություն կունենան բուհն ավարտելուց հետո ևս առնվազն երեք տարի տարկետում ստանալ՝ Կառավարության կողմից նշված ոլորտում Հայաստանի Հանրապետությունում աշխատելու համար, որից հետո կազատվեն զինծառայությունից։ 

Ըստ որոշման հիմնավորման՝ այս փոփոխությունը հնարավորություն կտա ներգրավելու արտերկրի հեղինակավոր բուհերի շրջանավարտներին, բարձր որակավորում ունեցող մասնագետներին, որոնք իրենց մասնագիտական աշխատանքով կնպաստեն երկրի համար առանցքային ոլորտների զարգացմանը։

2018 թվականից գործող կարգի շրջանակում Շանհայի վարկանիշավորման ցանկում ընդգրկված բուհերում սովորելու նպատակով արդեն իսկ տարկետում է ստացել 650 քաղաքացի՝ տարբեր կրթական աստիճաններով։ Նրանցից 570-ը շարունակում է ուսումը և օգտվում է տարկետման իրավունքից, սակայն անհրաժեշտ է կատարելագործել գործիքակազմը՝ ապահովելու այդ քաղաքացիների վերադարձը և նրանց ներուժի արդյունավետ կիրառումը գիտության, տնտեսության, քաղաքացիական ծառայության և այլ ոլորտներում։

ՀՀ վերադարձը խթանելու և ներգրավված մասնագետների ներուժն առավել արդյունավետ օգտագործելու նպատակով փոփոխությունները տարածվելու են նաև Կառավարության 2018 թվականի ապրիլի 12-ի որոշման հավելվածի 9.1 կետով տարկետում ստացած և ուսումը ավարտած քաղաքացիների վրա։ Մասնավորապես՝ այս օրենսդրական փոփոխությունից հետո համապատասխան ենթաօրենսդրական ակտերով սահմանվելու է, որ նշված հիմքով պարտադիր զինվորական ծառայության զորակոչից տարկետում ստացած և ուսումն ավարտած քաղաքացիները պարտավորություն կունենան վերադառնալ Հայաստանի Հանրապետություն և աշխատել մեր պետության համար: Նախատեսվում է, որ  ՀՀ-ում համապատասխան կարգով աշխատանքի անցնելու համար ևս զինվորական ծառայության զորակոչից տարկետում ստանալու և պարտադիր զինվորական ծառայությունից ազատվելու համակարգ կգործի:

Նախագիծը սահմանված կարգով կներկայացվի Ազգային ժողովի քննարկման։