Ո՞ր երկրում կարող են հանդիպել Պուտինն ու Թրամփը

 Ուիթկոֆի հետ հանդիպումից հետո, Պուտինի օգնական Ուշակովը հայտարարեց, որ կողմերը համաձայնվել են հանդիպումը կազմակերպել բարձր մակարդակով և նույնիսկ հանդիպման վայրն է արդեն որոշված:

Լրագրողներին չհաջողվեց ստանալ տեղեկատվություն, թե որ երկրում է կայանալու այդ հանդիպումը, որից հետո փորձագետները սկսեցին գուշակություններով հանդես գալ:

Սկզբից խոսվում էր, որ հանդիպման վայրը կարող էր լենել Ստամբուլը, քանի որ հենց այս քաղաքում էին ընթանում ռուս-ուկրաինական բանակցություններն ավելի ցածր մակարդակով: Մանավանդ, որ Ուիթկոֆի հանդիպումից անմիջապես հետո, եղավ Լավրով-Ֆիդան հեռախոսազրույցը:

Սակայն Անկարայից, պատկան մարմինները նշեցին, որ «նման ազդակ չեն ստացել կողմերից»:

Հետո նշվեց Սաուդյան Արաբիան:

Եվրոպական փորձագետները նշում էին նույնիսկ Վատիկանը՝ որպես հնարավոր հանդիպման դիտարկվող վայր:

Ռուսական կողմն այդ լուրերը չի արձագանքում. այստեղ նշում են, որ բացառված է, որ Պուտինը մեկնի որևէ եվրոպական երկիր:

 Բրիտանական The Guardian թերթը, փաստացի հաստատում է այդ պնդումը,  նշելով, որ հնարավոր հանդիպման վայրի աշխարհագրական շրջանակը նախապես սահմանափակված է։

Քանի որ, Ռուսաստանի առաջնորդին ձերբակալելու Միջազգային քրեական դատարանի (ՄՔԴ) որոշման հետ կապված՝ արևմտյան երկրներն ակնհայտորեն բացառվում են այդ  ցուցակից։

Այսօր արդեն, ռուսական աղբյուրներից մեկը նշեց, որ Պուտինի և Թրամփի միջև բանակցությունների վայրի հիմնական չափանիշը կլինի երկրի չեզոք դիրքորոշումը ռուս-ուկրաինական կոնֆլիկտի նկատմամբ։

Պարսից ծոցի միապետություններից մեկում հնարավոր հանդիպման մասին հաղորդագրությունների ֆոնին, Պուտինն այսօր,  օգոստոսի 7-ին բանակցություններ է վարում  ԱՄԷ նախագահ Մոհամմեդ բին Զայեդ ալ Նահյանի հետ։

Փորձագետները նշում են նաև  Չինաստանի մայրաքաղաք Պեկինի տարբերակը, քանի որ  «երկու առաջնորդներն էլ հրավիրվել են Չինաստան՝ Ասիայում Երկրորդ համաշխարհային պատերազմի ավարտի պատվին կայանալիք շքերթի. հանդիպումը կարող է տեղի ունենալ նաև այս գագաթնաժողովի շրջանակներում»։

Պարզ է մեկ բան. հանդիպման վայրը նույնպես հետաքրքիր է, քանզի  այդ երկիրը ստանում է «չեզոք երկրի»  կարգավիճակ, հաշվի առնելով այն, որ նախկինում այդ կարգավիճակն ունեցող Շվեյցարիան, վաղուց է կորցրել իր այդ կարգավիճակը:

Սա է իրականությունը:

Արտակ Հակոբյան
Zham.am