Վարչապետ կոչվածի «պլանի» հրապարակմանը հետևելու են տոտալ ձերբակալությունները. Ստեփան Դանիելյան

Այսպես կոչված «հեղաշրջման պլանի» հրապարակումը կարելի էր հումորի վերածել, եթե նման նյութ չտարածեր վարչապետ կոչված անձնավորությունը։ Այս մասին «Փաստինֆո»-ի հետ զրույցում ասաց «Մայր Հայաստան» շարժման նախաձեռնող խմբի անդամ, քաղաքագետ Ստեփան Դանիելյանը՝ ընդգծելով, որ այդ, այսպես կոչված, պլանը բավական պրիմիտիվ էր գրված։

«Նման հեղաշրջման պլան երևի յոթ-ութերորդ դասարանի տղան կարող է գրել։ Բայց մենք արդեն մտել ենք մի այնպիսի մարազմատիկ իրավիճակ, որ նման պլաններ է հրապարակում վարչապետ կոչվածը։ Իհարկե, կյանքը ցույց է տալիս, որ մեր ընդդիմությունը իր մտավոր ունակություններով շատ չի փայլում, բայց, համենայնդեպս, նման պրիմիտիվության մակարդակի չունի»։

Նրա դիտարկմամբ՝ գործող կառավարությունը, իշխանությունը պատրաստվում է ընտրություններին՝ հասկանալով, որ ընտրություններում հաղթելու որևէ հնարավորություն չունի։

«Կարծում եմ, առաջիկայում ինչ-որ ձերբակալություններ են իրականացվելու՝ փորձելով վախի մթնոլորտ ստեղծել, բացառապես որի շնորհիվ էլ փորձելու են վերարտադրվել։ Միաժամանակ, այդ ընթացքում գուցե ուրիշ անունով այսպես կոչված «Զանգեզուրի միջանցք» իրականացնեն։ Որքան հասկանում եմ, այդ ծրագրին այլևս ամերիկացիներ են միացել, ուստի արդեն թուրք-ադրբեջանական և արևմտյան ռեսուրսով կփորձեն վերարտադրվել։

Այսինքն՝ ձերբակալություններով փորձելու են թույլ չտալ, որ իրենց համար անցանկալի անձինք, քաղաքական թևը ինչ-որ կերպ մասնակցեն ընտրություններին, փորձելով արհեստական ընդդիմություններ ստեղծել՝ նպատակ ունենալով դեմոկրատական ընտրությունների շղարշ ձևավորել»,-ասաց Դանիելյանը՝ ընդգծելով, որ եթե այս տրամաբանությունն է աշխատում, ապա առաջիկայում մենք կլսենք ինչ-որ այլ անունով «Զանգեզուրի միջանցքի» մասին։

«Դրա անունը ոչ միջանցք կլինի, ոչ էլ Զանգեզուր։ Այդ մասին ուղղակի արդեն խոսել է վարչապետ կոչված անձնավորությունը, որը ասել էր, թե էական չէ, թե ով ինչ անուն կդնի այդ միջանցքին. իրենք դրա անունը դնում են Խաղաղության խաչմերուկ։ Կարծում եմ՝ սա է այս պահին կատարվում»,-ասաց նա՝ ընդգծելով, որ իր գնահատմամբ՝ հրապարակված պլանը բավականին վատ կատարողական որակի էր, և կարելի էր ավելի համոզիչ փաստաթուղթ սարքել։

«Նման փաստաթղթի հրապարակումից հետո տրամաբանությունն ասում է, որ այո, պետք է լինեն արդեն ձերբակալություններ ընդդիմադիր քաղաքական դաշտում, որովհետև եթե վարչապետ կոչվածը նման փաստաթուղթ է հրապարակում, ապա պետք է լինի նաև հաջորդ քայլը։ Իսկ հաջորդ քայլը լինելու են տոտալ ձերբակալություններ՝ ունենալով Թուրքիայի, Ադրբեջանի և Միացյալ Նահանգների աջակցությունը, որովհետև նպատակը, ինչպես նշեցի, այս միջանցք կոչվածն է, որը ադրբեջանցիները և թուրքերը անվանում են «Զանգեզուրի միջանցք»»։