Անդրանիկ Քոչարյանն անհետ կորածների ծնողներին մոլորեցրել է ու հոխորտում է

«Ժողովուրդ» օրաթերթը գրում է.

«ՔՊ խմբակցության պատգամավոր Անդրանիկ Քոչարյանը անհետ կորած զինվորների ծնողներին անորոշ վիճակի մեջ է դրել. խոստացել է տեղեկություններ տրամադրել, սակայն հիմա չի կարողանում տալ դրանք։ Ահազանգեր ենք ստանում անհետ կորած զինվորների ծնողներից այն մասին, որ նախորդ տարի, երբ իրենք փակել էին Բաղրամյան պողոտան, Անդրանիկ Քոչարյանը, թերևս նման դեպքերը բացառելու համար, հանդիպել է ծնողներին, խոստացել է բաներ, որոնք այժմ չի կարողանում իրականացնել:

Լուրեր հասան, որ Անդրանիկ Քոչարյանը ծնողներից մի քանիսին ասել է, թե իրենց հանձնաժողովը հստակ տեղեկություններ գիտի անհետ կորածների մասին, երբ ծնողները խնդրել են, որ իրենց ևս ինֆորմացիա տան որդիների մասին, Քոչարյանը հոխորտացել է, թե դա միայն իշխանությունների գործն է, ուժայինները կորոշեն՝ ինչ ասել, ինչ ոչ, ինքը չի կարող ծնողներին տեղեկություններ տալ։

Տեղեկացանք, որ շատ ծնողներ վերջին մեկ շաբաթվա ընթացքում զանգահարել են ԱԺ պաշտպանության և անվտանգության հարցերի մշտական հանձնաժողովի ՔՊ-ական պատգամավորներին և խնդրել, որ իրենց որդիների պահման վայրի մասին ինֆորմացիա տան: Սակայն գրեթե բոլոր պատգամավորները ծնողներին պատասխանել են, թե Քոչարյանի այդ հայտարարությունից տեղյակ չեն, անհետ կորածների մասին էլ գիտեն այն, ինչ ծնողները։ Այսինքն՝ Անդրանիկ Քոչարյանն իր հայտարարություններով վատ դրության մեջ է դրել անհետ կորածների ծնողներին, խաղացել նրանց հույզերի հետ և անհարմար իրավիճակ ստեղծել ոչ միայն իր, այլև թիմակիցների համար»:

Մանրամասները՝ թերթի համարում։