Անցած երկու տարիներին կառավարությունը որևէ շահույթ չի ստացել հանքաարդյունաբերության ոլորտի իր բաժնեմասից ու թաքնվում է մասնավոր ընկերության թիկունքում

ԶՊՄԿ-ի բաժնետեր դառնալուց հետո ՀՀ կառավարությունն առ այս պահը որևէ եկամուտ չի ստացել, շահույթի վերաբաշխում չի կատարվել, թեև ԶՊՄԿ-ն հանդիսանում է թիվ 1 հարկատուներից մեկը։ Այս մասին գրում է «Փաստինֆո»-ն ու մանրամասնում.

«Ինչպես արդեն հայտնել ենք՝ 2021թ․ կասկածելի ու գիշերային գործարքի արդյունքում ԶՊՄԿ-ում փոխվեց հիմնական բաժնետերը ու կառավարությունն անմիջապես «փայ մտավ»՝ դառնալով ԶՊՄԿ-ի բաժնետերերից մեկը։ Այսօր կառավարությունն ունի ընկերության բաժնետոմսերի շուրջ 21 տոկոսը։

«Փաստինֆո»-ն գրավոր հարցում է ուղարկել Պետական գույքի կառավարման կոմիտեին՝ պարզելու, թե ԶՊՄԿ-ի բաժնետոմսերի մի մասը ՀՀ կառավարությանը փոխանցվելուց հետո որքա՞ն է կազմել ՓԲԸ-ի շահույթը, որքա՞ն է կազմել բաժնետերերի շահույթը, 2022-23թթ շահույթի վերաբաշխում տեղի է ունեցել, թե՝ ոչ, եթե այո, ապա որքան է կազմել ՀՀ կառավարության՝ որպես բաժնետիրոջ շահույթը, եթե շահույթի վերաբաշխում չի կատարվել, ապա խնդրել ենք հայտնել պատճառները և թե ինչպես է տնօրինվել շահույթը։

Սակայն, ի զարմանս, Պետական գույքի կառավարման կոմիտեն իրեն դրսևորել է մասնավոր ընկերություն ու հրաժարվել տեղեկություն տրամադրել՝ «Փաստինֆո»-ին ուղարկելով ԶՊՄԿ ՓԲԸ գլխավոր տնօրենի տեղակալի պատասխանը, թե «ԶՊՄԿ» ՓԲԸ-ին չի կարող վերապահվել տեղեկությունների տրամադրման որևէ պարտավորություն»։

Ընդգծենք՝ մեր հարցումն ուղղված էր պետական գույքի կառավարման կոմիտեին, որին, ըստ կառավարության որոշման, վերապահվել է բաժնետոմսերի կառավարումը, իսկ ՀՀ Սահմանադրության 51-րդ հոդվածը, այնպես էլ «Տեղեկատվության ազատության մասին» ՀՀ օրենքը պարտավորեցնում են պետական մարմիններին տրամադրել տեղեկություններ։ Մեզ հետաքրքրում էր կառավարության ստացած եկամուտը, բայց պարզվեց, կառավարությունն արդեն գործում է բաժնետիրական ընկերության կանոններով, իրեն համարում մասնավոր ընկերություն կամ էլ թաքնվում մասնավոր ընկերության թիկունքում։ Քանզի մեր ունեցած տեղեկություններով վերջին տարիներին շահույթի վերաբաշխում տեղի չի ունեցել ու կառավարությունը՝ որպես բաժնետեր, եկամուտ չի ստացել, իսկ պատճառների մասին լռում է։

Առավել մտահոգիչն այն է, որ բարձրաստիճան պաշտոնատար անձին հղված հարցմանն ի պատասխան ուղարկվում է մասնավոր ընկերության տնօրենի տեղակալի ստորագրությամբ գրությունը։ ԶՊՄԿ-ի տեղը գիտենք, հարցում ուղարկելու ձևը ևս ու կառավարություննից չէինք ակնկալել միջնորդություն՝ մասնավոր ընկերությունից պատասխան ստանալու համար։ Պետական մարմնի նման գործելաոճը հաստատում է այն կասկածները, որ կառավարությունը չգիտի ինչպես վարվել բաժնետոմսերի հետ, ինչպես դրանք պահել իր ձեռքում, բայց հանրության առաջ չունենալ որևէ պատասխանատվություն դրանք տնօրինելու արդյունավետության համատեքստում»։