Ամերիաբանկը ԴիջիԹեք 2024-ի ֆինթեք գործընկերն է. բանկը ներկայանում է MyInvest ներդրումային հարթակով (տեսանյութ, լուսանկար)

Ամերիաբանկը Երևանում անցկացվող «ԴիջիԹեք Էքպո 2024»–ի ֆինթեք գործընկերն է և ներկայանում է իր MyInvest ներդրումային հարթակով: Հարթակը հնարավորություն է տալիս րոպեների ընթացում օնլայն բացել բրոքերային հաշիվ և առանց բանկ այցելելու գործարքներ կատարել ինչպես հայկական, այնպես էլ ամերիկյան, եվրոպական և ասիական երկրների բորսաներում ու արտաբորսայական շուկաներում:

«Արմենպրես»-ի փոխանցմամբ՝ ԴիջիԹեք-ի շրջանակում լրագրողների հետ զրույցում Ամերիաբանկի Առևտրային գործառնությունների դեպարտամենտի Արտարժութային և բրոքերային գործառնությունների գծով համատնօրեն Դիանա Հակոբյանը նշեց, որ MyInvest-ը ներդրումային, թվային հարթակ է՝ Ամերիաբանկի MyAmeria հավելվածում, որը հնարավորություն է տալիս շատ արագ հասանելիություն ունենալ թե տեղական, թե միջազգային շուկաների տարբեր ներդրումային գործիքներին:

«Մենք տալիս ենք հասանելիություն 30-ից ավելի շուկաներին և 25 հազարից ավելի ներդրումային գործիքներին: Մեր ցանկացած հաճախորդ կարող է գտնել իր նպատակներին, իր ռիսկերի ախորժակին համահունչ ցանկացած գործիք»,-ասաց Դիանա Հակոբյանը:

Ներդրողները MyInvest հարթակի միջոցով կարող են ձեռք բերել պարտատոմսեր, բաժնետոմսեր ու ETF-ներ (Ի ԹԻ ԷՖ-ներ): Հարթակի միջոցով տարբեր ընկերություններ, բիզնեսներ նաև հնարավորություն ունեն իրականացնելու պարտատոմսերի և բաժնետոմսերի տեղաբաշխումներ՝ ներգրավելով նոր ֆինանսական միջոցներ իրենց բիզնեսի զարգացման համար։

«Ինչպես գիտեք՝ Ամերիաբանկը շուկայում առաջատար թե՚ թողարկող, թե՚ տեղաբաշխող ընկերություն է: Օրինակ՝ վերջերս տեղաբաշխել ենք ՀԷՑ-ի պարտատոմսեր՝ 2 տրանշով՝ 60 մլն դոլարի չափով: Բավականին հաջող, աննախադեպ ծավալով տեղաբաշխում է եղել: Այդ մեծ ծավալից 20 տոկոսն իրականացվել է MyInvest հարթակով, որը, կարծում եմ, շատ հաջողված ցուցանիշ է»,-ասաց Հակոբյանը:

Հարթակն ամբողջությամբ մշակել է Ամերիաբանկի փորձառու թիմը, որն անընդհատ աշխատում է հարթակը զարգացնելու և հաճախորդների համար անհատականացված լուծումներ մշակելու ուղղությամբ՝ ի պատասխան հաճախորդների կարիքների, նրանցից ստացված արձագանքների:

Բանկում նկատում են՝ հարթակը շատ սիրված է հաճախորդների կողմից:

«Նախորդ տարի մենք եռապատկել ենք հաճախորդների քանակը, որոնք ներդրում են անում: Այս տարի արդեն իսկ նախորդ տարվա թիվը կրկնապատկված է: Տարվա վերջում կարծում եմ, որ եռապատիկ աճ կունենանք: Դա հուշում է այն մասին, որ մեր ջանքերը՝ ներդրումներ կատարելու մշակույթը սովորեցնելու, իրենց արդյունքը տալիս են: Տեխնոլոգիաները հնարավորություն են տալիս հեշտությամբ՝ մի քանի քայլով արդեն իսկ դառնալ աշխարհի խոշորագույն կազմակերպությունների բաժնետեր՝ կլինի Apple-ը կամ խոշորագույն կապիտալիզացիայով ընկերությունների բաժնետեր»,-նշեց Ամերիաբանկի բրոքերային ծառայության ղեկավար Արտուշ Ենգիբարյանը:

ԴիջիԹեք–ում Ամերիաբանկի տաղավարը կառուցված է լավ ներդրող դառնալու համար անհրաժեշտ հատկանիշների շուրջ՝ հեռատես, համբերատար, հավասարակշռված, խելացի, համարձակ և հաջողակ: Այդ որակներին համապատասխան մշակել են 6 փորձություն, որոնք այցելուները հաջողությամբ անցնելու դեպքում հնարավորություն ունեն անվճար բացելու բրոքերային հաշիվ և ստանալու իրենց առաջին բաժնետոմսը նվեր: Խաղերը հատկապես երիտասարդ այցելուներին շատ են հետաքրքրել:

Ներդրումների աշխարհն էլ ավելի խորությամբ բացահայտել ցանկացողների համար Դիջիթեք_ի շրջանակում այս տարի առաջին անգամ անցկացվում է նաև Digi/Invest համաժողովը: Digi/Invest-ի առանցքում թվայնացման, ներդրումների ու ֆինանսական գրագիտության բարձրացման թեմաներն են: Համաժողովի շրջանակում անցկացվող «Թվային ներդրումների ապագան. նոր գործիքներ և հնարավորություններ Հայաստանի ֆինանսական շուկայում» խորագրով պանելային քննարկմանը մասնակցեց նաև Ամերիաբանկի Առևտրային գործառնությունների դեպարտամենտի Արտարժութային և բրոքերային գործառնությունների գծով համատնօրեն Դիանա Հակոբյանը: