Լավաշը թանկացել է, հացը և հացամթերքն էլ առաջիկայում կթանկանան

Հայաստանում 1 ամսում ալյուրի 50 կգ–անոց պարկի գինը թանկացել է 3.5 դոլարով (մոտ` 1400 դրամ), 1 կգ–ը` 27 դրամով։ Sputnik Արմենիայի հետ զրույցում այս մասին հայտնեց Սևանի հացի գործարանի հիմնադիր–տնօրեն, սեփականատեր Աշոտ Ավետիսյանը` մեկնաբանելով հայաստանյան խանութներում լավաշի այսօր նկատված թանկացումը։

Նշենք, որ հայաստանյան վաճառակետերում հոկտեմբերի 2-ին 1 կգ լավաշը վաճառվում է 620 դրամով` երեկվա 595 դրամի դիմաց։

«Լավաշի թանկացման հիմնական պատճառը ալյուրի գնի բարձրացումն է։ Վերջին 1 ամսվա ընթացքում 50 կգ–անոց պարկը 21 դոլարից դարձել է 24.3 դոլար։ Համարժեք չափով բարձրացել է նաև լավաշի 1 կգ–ի գինը»,–ասաց Ավետիսյանը։

Սևանի հացի գործարանի տնօրենը հիշեցնում է, որ Հայաստան ներկրվող ցորենի 99,9 տոկոսը Ռուսաստանից է, և տեղական շուկայում թանկացումը, նրա մեկնաբանմամբ, կապված է հենց ՌԴ–ում ցորենի գնի թանկացման հետ։

«Ռուսաստանում այս տարի երաշտ է գրանցվել, ու ցորենի արտադրության մեծ դեֆիցիտ կա։ Այնպես որ հավանականությունը մեծ է, որ առաջիկայում ՌԴ–ից ներկրվող ցորենի գինը էլի կբարձրանա»,–կարծում է գործարարը` միաժամանակ չբացառելով, որ լավաշից բացի առաջիկայում թանկացումների ալիքը կհասնի նաև հացին, խմորեղենին, մակարոնեղենին ու ալրային այլ արտադրանքին։

«Հացի գինը թերևս շատ չի բարձրանա։ Կոնկրետ գումար չեմ կարող ասել, որովհետև մենք շուրջ 60 տեսակի հաց ենք արտադրում։ Բայց որոշակի գնային փոփոխություն կլինի»,–նշեց Ավետիսյանը։

Ի դեպ, հայաստանյան արտադրության հացի գնագոյացման վրա, ըստ մեր զրուցակցի, ազդում են ոչ միայն հումքի գինն ու արտադրական և ճանապարհային ծախսերը, այլև խանութներում չիրացված ու վերադարձված հացի արժեքը։

«Հայաստանում արտադրվող հացի մոտ 10-15 տոկոսի օրական վերադարձ է լինում։ Այդ հացը միայն հնարավոր է որպես անասնակեր վաճառել։ Եվ այդ հետադարձ հացի արժեքը արտադրողն արդեն նախապես ստիպված է լինում հացի գնի մեջ հաշվարկել։ Այլ տարբերակ չկա, ստիպված ինքնարժեքի մեջ են հաշվում, որովհետև վաճառողը նախապես պայման է դնում, որ չվաճառված հացը արտադրողը պետք է հետ տանի»,–պարզաբանում է գործարանի տնօրենը։

Նա հիշեցնում է, որ սեպտեմբեր ամսվա վերջին 1 շաբաթում ռուսական արտադրության ցորենի 1 տոննայի գինը միջազգային շուկայում ավելացել է 650–800 ռուբլով։ Ըստ ռուսաստանյան վերլուծաբանների` եթե 2023թ–ի սեպտեմբերին ռուսական ցորենի 1 տոննայի գինը տատանվում էր 11,8 - 14,65 հազար ռուբլու միջակայքում, ապա այս տարի այն արդեն հասել է հասել 16-17,5 հազար ռուբլու։