Օրվա կադրը. Բագրատ սրբազանը ողջունում է ԱԺ ընդունարանի մոտ ծառայող ոստիկաններին

Բագրատ արքեպիսկոպոս Գալստանյանի գլխավորությամբ «Տավուշը՝ հանուն Հայրենիքի» շարժման այսօրվա ակցիայի մասնակիցները Քննչական կոմիտեի մոտից երթով շարժվում են դեպի սուրբ Աննա եկեղեցի: Բաղարմյան պողոտայով անցնելիս, երբ երթը հասավ ԱԺ շենքին, Բագրատ սրբազանը մոտեցավ խորհրդարանի ընդունարանի մոտ ծառայություն իրականացնող ոստիկանների շարքին և բոլորին առձեռն ողջունեց, պարզ ասած՝ բարևեց: 
Այս օրերին ոստիկանության տարբեր բարձրաստիճան ներկայացուցիչներ, շարժման ակցիաների ժամանակ պարբերաբար ասում են՝ «մի վիրավորեք ոստիկանությանը, մի վիրավորեք ոստիկանությանը»: Մինչդեռ թե՛ Բագրատ սրբազանը, թե՛ շարժման այլ ներկայացուցիչներ, առավել քան հստակ նշել ու նշում են, որ հնչեցրած կոշտ գնահատականները ոչ թե առհասարակ ոստիկանությանն են ուղղված, այլ այն խմբերին, որոնք ոստիկանական համազգեստի տակ պատսպարված, զբաղվում են ջարդարարությամբ, խաղաղ ցուցարարներին խոշտանգելով և այլ հակաօրինական արարքներով: 
ԱԺ ընդունարանի մոտ ծառայող ոստիկաններին մոտենալն ու ողջունելու դպրվագը ևս մեկ անգամ հստակ ցույց տվեց, որ իրականում ոստիկանության հետ շփման առումով լարվածությունը հաստատ Բագրատ սրբազանից չի գալիս: 
Հ.Գ.
Կարծում ենք, զանազան ծայրահեղ ու վախվորած ընկալումների մեջ ընկղմված փաշինյանական իշխանությունն այնքան խելք կունենա, որ ԱԺ ընդունարանի մոտ ծառայություն իրականացնող ու սրբազանին բարևած ոստիկաններին «գործից չի ազատի»: