Փաշինյանը կնոջ հետ թող գա, Ոսկեպարի իմ տանն ապրի, տեսնեմ՝ թուրքի հետ ո՞նց են ապրելու․ ոսկեպարցիներն ու բաղանիսցիները դեմ են հողեր հանձնելուն (տեսանյութ)

Alphanews.am-ի ռեպորտաժը:
Վարչապետ Նիկոլ Փաշինյանի՝ մարտի 18-ին Ոսկեպար այցից հետո, գյուղում անորոշ վիճակ է: Մարդիկ սպասում են իշխանությունների որոշմանը՝ հուսով, որ 4 գյուղերը չեն զիջվի հակառակորդին՝ Ադրբեջանին: Հակառակ դեպքում Ոսկեպարը կհայտնվի թշնամու նշանառության տակ:
Ոսկեպարցի Անահիտ Ալավերդյանի ամուսինը զոհվել է 1993 թվականին՝ ադրբեջանական դիվերսիայի հետեւանքով: 31 տարի անց՝ 2024-ին, Փաշինյանի՝ գյուղ այցից հետո, տիկին Անահիտը վերապրում է իր կյանքի ամենադաժան օրերը: «Ես 4 անչափահաս երեխա եմ մեծացրել, բայց կռիվ չի եղել, իհարկե, թուրքերը էլի կրակել են, բայց ապրել ենք: Հիմա, երբ նոր ուզում եմ հանգիստ ապրեմ, լսում ենք հնարավոր զիջման ու կռվի մասին: Թուրքը գալու է Ոսկեպարի գլխին նիստի, ես իմ թոռանը ո՞նց պահեմ: Հողամաս չեմ կարողանալու գնալ, եթե գնամ, ինձ մեռած են հետ բերելու: Նիկոլ Փաշինյանը թող իր կնոջ, երեխաների հետ գա իմ տանն ապրի, ես իմ տունն իրենց եմ տալիս, ես էլ կգնամ իրենց տուն: Տեսնեմ՝ քանի օր իմ տանը կապրեն, եթե կապրեն, ուրեմն ես էլ կապրեմ իմ հարեւանի տանը, տեսնեմ՝ ոնց են թուրքի հետ ապրելու: Մարդկանց ցուցակ կա, որ թուրքերը գան էդ մարդկանց հետ հաշվեհարդար տեսնեն, ստեղ ապրելը ո՞նց կլինի, կամ մենք ենք մեռնելու, կամ՝ իրենք: Թուրքը կանգ չի առնելու, հաջորդը Կիրովականը, Երեւանն են լինելու»,- Alpha News-ի հետ զրույցում ասաց Ոսկեպարի բնակչուհին: