Գլխավոր քարտուղարին գաղտնալսե՞լ են. ինչու՞ է վարչապետն աշխատանքից ազատել Կարեն Սարգսյանին

Էկոնոմիկայի նախարարությունում տարին սկսել է սկանդալային պաշտոնանկություններով: Էկոնոմիկայի երիտասարդ փոխնախարար Անի Իսպիրյանի պաշտոնանկությունից առաջ նախարարությունում մեկ այլ՝ ոչ պակաս կարևոր պաշտոնյա է ազատվել աշխատանքից:
Խոսքը Էկոնոմիկայի նախարարության գլխավոր քարտուղար, ԳԱԱ տնտեսագիտության և կառավարման ամբիոնի վարիչ Կարեն Սարգսյանի մասին է, ում պաշտոնանկության պատճառների մասին NEWS.am-ին ուշագրավ մանրամասներ են հայտնի դարձել:
Մասնավորապես նախարարության մեր աղբյուրները հայտնում են, որ տևական ժամանակ ԱԱԾ-ն գաղտնալսումներ է իրականացրել էկոնոմիկայի նախարարությունում և ստացված տվյալները փոխանցել վարչապետին: ԱԱԾ-ի գաղտնի օպերացիայի «զոհ» է դարձել նաև Սարգսյանը, ում հորդորել են ավելորդ աղմուկից խուսափելու համար աշխատանքից ազատման դիմում գրել, իսկ 2024 թվականի հունվարի 12-ին վարչապետ Նիկոլ Փաշինյանը որոշում է ստորագրել Կարեն Սարգսյանին էկոնոմիկայի նախարարության գլխավոր քարտուղարի պաշտոնից ազատելու մասին: Ներկայումս նախարարության գլխավոր քարտուղարի պարտականությունները ժամանակավորապես կատարում է Ժաննա Զաքարյանը:
Կարեն Սարգսյանը NEWS.am-ի հետ հեռախոսազրույցում հայտնեց, որ աշխատանքից դուրս է եկել իր ցանկությամբ՝ սեփական դիմումի համաձայն։ Նա հրաժարվեց մեկնաբանել ազատման պատճառը՝ միաժամանակ հերքելով իրեն գաղտնալսելու, իր անվան հետ կապված «այլ» խոսակցությունները:
«Հիմա ես միայն դասախոսական աշխատանքով եմ զբաղվում՝ գիտամանկավարժական։ Դա տվյալ պահին ավելի հոգեհարազատ է։ Թե՛ անձական, թե՛ աշխատանքային որևէ խնդիր չի եղել։ Դա իմ անձնական որոշումն է։ Երևի ինձ այդքան էլ հարմար չէր։ Թե հետագայում ո՞նց, ի՞նչ, չեմ կարող ասել։ Բայց էս պահին այսպես է ճիշտ»,- ասաց Կարեն Սարգսյանը։
Նշենք, որ Սարգսյանը նախարարության գլխավոր քարտուղարի պաշտոնում նշանակվել էր 2022-ի դեկտեմբերին։ Մինչ այդ նա հանդիսանում էր «Լուսավոր Հայաստան» կուսակցության տնտեսական հանձնաժողովի քարտուղարը և աչքի էր ընկնում գործող իշխանությունների օգտին տնտեսական մեկնաբանություններ անելով, կառավարության տնտեսական աճի ցուցանիշները գովաբանելով: