Շան հարձակման հետևանքով Էջմիածնի քաղաքապետարանի աշխատակիցը տեղափոխվել է հիվանդանոց

Հունվարի 26-ին արտակարգ դեպք է տեղի ունեցել Արմավիրի մարզում: Ժամը 10:30-ի սահմաններում Հերացու անվան թիվ 1 համալսարանական հիվանդանոցից ՆԳՆ ոստիկանության Արմավիրի մարզային վարչության օպերատիվ կառավարման կենտրոն ահազանգ է ստացվել, որ «Վաղարշապատ» ԲԿ-ից շան կծելու հետևանքով շտապօգնության բժիշկների հերթապահ խումբը իրենց մոտ է տեղափոխել մի կնոջ: Ինչպես հայտնում է Գ. Շամշյանը, բժիշկները ոստիկաններին հայտնել են, որ վիրավորը հիվանդանոց է բերվել «գլխի, պարանոցի, վերջույթների հատվածի բազմակի կծած վերքեր» ախտորոշմամբ և ի վիճակի չէ կատարվածի մասին բացատրություն տալու, քանի որ գտնվում է վիրահատարանում: Ոստիկանները պարզել են, որ հիվանդանոց տեղափոխվածն Արմավիրի մարզի բնակիչ, 73-ամյա Աիդա Ն-ն է: Պարզվել է, որ դեպքը տեղի է ունեցել նույն օրը՝ վաղ առավոտյան. վիրավորն աշխատում է Էջմիածնի քաղաքապետարանի կոմունալ ծառայությունում՝ որպես մաքրուհի: Աշխատելիս է եղել, երբ թափառող շունը հարձակվել է նրա վրա: