«Մայր Հայաստան» խմբակցության անդամներն այցելել են «Կենդանիների խնամքի կենտրոն» ՀՈԱԿ

Երևանի ավագանու «Մայր Հայաստան» խմբակցության անդամներով այցելել ենք Երևանի քաղաքապետարանի ենթակայության տակ գտնվող «Կենդանիների խնամքի կենտրոն» ՀՈԱԿ։ Այցն իրականացրել ենք Երևանի ավագանու վերահսկողական գործառույթների շրջանակում և կենդանասերների կողմից ստացված բազմաթիվ դիմում-բողոքների հետքերով։ Առկա խնդիրները տեղում ներկայացրել ենք «Կենդանիների խնամքի կենտրոն» ՀՈԱԿ-ի տնօրինությանը, շրջայց իրականացրել թափառող կենդանիների ժամանակավոր պահման կացարանում, կարանտինում գտնվող շների համար հատկացված հատվածում և վիրահատարանում։

Այս ոլորտում առկա խնդիրները տարաբնույթ են, բազմաշերտ և համակարգային լուծում են պահանջում։ Պետությունն իր գործառույթը պետք է պատշաճ կատարի, որպեսզի ապահովի թափառող կենդանիների ստերջացումը, պատվաստումը, բուժումը, նրանց պահման համար առանձնացված տարածքներ կառուցի, կարգավորի վաճառքի նպատակով կենդանիներին բազմացնելու գործընթացը, ապահովի ընտանի կենդանիների չիպավորումը, բացառի գումար վաստակելու նպատակով շներին կռվացնելու դեպքերը, պատժի թափառող կենդանիների նկատմամբ դաժան վերաբերմունք ցուցաբերողներին և թափառող կենդանիների հարձակումներից ապահովի քաղաքացիների անվտանգությունը։

Ինչպես նշեցի, թափառող կենդանիների խնդիրը մեր երկրում բազմաբնույթ է ու խորքային լուծում է պահանջում, և այս հարցը լինելու է «Մայր Հայաստան» խմբակցության մշտական ուշադրության կենտրոնում։

Երևանի ավագանու «Մայր Հայաստան» խմբակցության անդամ Սոնա Աղեկյանի ֆեյսբուքյան էջից