Փաշինյանը «փրթում» է յուրայիններին. Արմավիրի մարզպետն էլ գործազրկվեց, ո՞վ է հաջորդը (տեսանյութ)

Եվս մի քանի այսպիսի աշխատանքային այց և Նիկոլ Փաշինյանի այսպես ասած «քաղաքական թիմի» շարքերը բավականին կնոսրանան: Այսօր էլ Փաշինյանը այցելել էր Արմավիրի մարզ, եղել էր Արագած համայնքում կառուցվածք մարզադահլիճում, կրկին դժգոհ էր մնացել շինարարական աշխատանքների որակից: Եվ, ահավասիկ, հետևանքը. Արմավիրի մարզպետ Էդվարդ Հովհաննիսյանը գնաց Լոռու մարզպետի հետքերով, այն է՝  ազատվել է զբաղեցրած պաշտոնից:
Փաշինյանի այցի տեսարանն, ինչ խոսք, էպիկական էր: Ոչ պակաս զավեշտական ու ծաղրանկարային էր տեսարանը, թե ինչպես են մարզի ուժային կառույցների ներկայացուցիչները «հավսար-զգաստ» վիճակում «պատվի առնում» Փաշինյանին ու ներկայանում նրան:
Իսկ հագուստի կախիչների գերագույն գլխավոր մասնագետ, ծորակների մոնտաժման գիտակ, շինաշխատանքների որակի ստուգման անգերազանցելի տեսուչ Նիկոլ Փաշինյանը հատ-հատ ծռմռում էր կախիչները, քաշքշում ծորակները, ստուգել տալիս ցնցուղների համապատասխանությունը: Ի դեպ, այս մի տեղում զուգարանի «պատերը» թափանցիկ ապակուց չէին, այլ անթափանց հախճասալից, բայց Արմավիրի մազրպետին դա չփրկեց պաշտոնազրկումից:
Մի խոսքով՝ Փաշինյանը իր թիմում միակն է, ով ամեն ինչից ինչ-որ բան է հասկանում, իսկ մնացածները գոյություն ունեն միայն նրա համար, որ իրենց գլուխները հլու-հնազանդ դնեն նրա «շանթուորոտի» տակ: Մի խոսքով, ծայրեծայր պոպուլիզմ, էժանագին շոու և «թատրոն»: Ափսոս միայն, որ Փաշինյանը չի փորձում անձամբ համոզվել, օրինակ, էլեկտրամատակարարում կա՞ վարդակներում և մատները չի մտցնում դրանց մեջ...
Ինչևէ: Հիշեցնենք, որ միայն վերջին ոչ ամբողջական շաբաթվա ընթացքում պաշտոններից հեռացվել են ԲՏԱ նախարարը, քաղաքաշինության կոմիտեի նախագահը, Լոռու և Արմավիրի մարզպետները: Բնականաբար, նրանց բոլորին էլ, այսպես ասած՝ «հասնում է», քանի որ նրանք բոլորն էլ նույն Նիկոլ Փաշինյանի համար «դոշ տվողներ» էին: Ու, կարելի է չկասկածել, որ Փաշինյանին իրենց հավատարմությունը ցուցադրելու համար իրենց պաշտոնավարման ընթացքում բազմաթիվ նորմալ ու ազնիվ մարդկանց ահագին վատություններ արած կլինեն: Դրա դիմաց պաշտոնազրկումը նրանց համար «թեթև վախի» է նմանվում: 
Բայց Փաշինյանը ուղղակիորեն «փրթում» է յուրայիններին: Ո՞վ է հաջորդը: Ի լրումն, սա յուրօրինակ մեսիջ է նրա թիմին, որ նրանցից յուրաքանչյուրը, օգտագործվելուց հետո, այ այդպես մի կողմ է նետվելու: 
Մյուս կողմից, դժվար է ասել, որ Արմավիրի մարզպետի պաշտոնազրկման պատճառը միայն Արագածի մարզադպրոցի թույլիկ կախիչներն էին: Նույնը՝ Լոռու մարզպետի պաշտոնազրկման վերաբերյալ: Չի կարելի բացառել, որ Փաշինյանը որոշել է գնալ արտահերթ ընտրությունների և փորձում է մարզպետների կազմը թարմացնել՝ նշանակելով իր մտերիմ «գվարդիայի» ներկայացուցիչների, որպեսզի նրանք բացարձակապես հեղինակազուրկ և անընդունելի վարչախմբի համար անհրաժեշտ թվեր ապահովեն: Ոչ պակաս զավեշտական է, որ պաշտոնից ազատված քաղաքաշինության կոմիտեի նախագահի պաշտոնի համար կառավարության էջով մրցույթի նման բան են հայտարարել, ասում են՝ ինքնակենսագրական տվյալներ ներկայացրեք: 
Բայց մեծ հաշվով, սա պարզապես ծաղր է. երկիրը թուրքական «կեռից» կախած, ադրբեջանաթուրքական ղասաբների  դանակի տակ մտցրած, Արցախը կործանած Նիկոլ Փաշինյանը իր ենթակաների պտուտակած կախիչների որակն է ստուգում ու գործից ազատում: 
Փաշինյանը, որ տապալվել է որպես վարչապետ, տապալել է ամեն ինչ, երկիրը կանգնեցրել է կրախի առաջ, եթե չասենք, որ գցել է կործանման ընթացքի մեջ, պարզ ասած՝ իր անմիջական պարտականությունները չի կատարել, զարմանում է, որ իր ենթակաները նույնպես ամեն մի գործ գլխառադ են անում: 
Ա.Հակոբյան
Zham.am