Բեռլինում կանցկացվեն Aurora Dialogues քննարկումներ

Հեղինակավոր հումանիտար գործիչները, գիտնականները,
բարերարները եւ գործարարները կքննարկեն գլոբալ միգրացիայի խնդիրը

Նոյեմբերի 27, 2017թ., ԵՐԵՎԱՆ. «Միլիոնավոր մարդկանց տեղաշարժ. զարգացման և ինտեգրացիայի անհրաժեշտություն» խորագրով Բեռլինի Aurora Dialogues քննարկումներն անդրադառնալու են, թե ինչպես Եվրոպական Միությունը եւ Գերմանիան կարող են նպաստել հումանիտար խնդիրների լուծմանը զարգացման եւ ինտեգրացիայի միջոցով: Քննարկումները տեղի կունենան 2017թ. դեկտեմբերի 4-5-ը «Ռոբերտ Բոշ» հիմնադրամի Բեռլինի ներկայացուցչության գրասենյակում: Համաժողովը «Ավրորա» մարդասիրական նախաձեռնության, «Ռոբերտ Բոշ» հիմնադրամի, «Մերկատոր» հիմնադրամի եւ «Գլոբալ հեռանկարներ» նախաձեռնության համատեղ ձեռնարկումն է:

Քննարկման մասնակիցները կանդրադառնան փախստականների ճգնաժամի հիմնական պատճառներին եւ այդ ուղղությամբ արված քայլերի արդյունավետությանը, ինչպիսիք են՝ մարդասիրական աջակցությունը, կրթությունը եւ սոցիալական ինտեգրացիան:

«Եթե մենք փախուստը եւ միգրացիան ճիշտ ընկալենք՝ որպես մարդկության համընդհանուր պատասխանատվություն, կասկած չկա, որ կկարողանանք հաղթահարել խնդիրները միասին: Մարդիկ փախստական չեն ծնվում, այլ դառնում են: Նրանք փախչում են բռնությունից եւ հալածանքներից, նրանք փախչում են, որովհետեւ վախենում են սեփական կյանքի համար: Լինել փախստական նշանալում է լինել կարիքավոր եւ մնալ ուրիշների օգնության հույսին», - ասաց Բունդեսթագի նախկին նախագահ Նորբերտ Լամերտը:

«Նշանակալից է, որ Aurora Dialogues-ը՝ որպես ամենահրատապ մարդասիրական խնդիրների քննարկումների կարեւոր միջազգային հարթակ, ընդլայնում է իր աշխարհագրությունը», - նշեց Ռուբեն Վարդանյանը՝«Ավրորա» մարդասիրական նախաձեռնության համահիմնադիրների անունից: «Մենք սկսել ենք Երեւանում՝ գործով արտահայտելով մեր երախտագիտությունը նրանց, ովքեր փրկեցին հայերին 1915թ.՝ ցեղասպանության ժամանակ: Այսօր մենք Բեռլինում ենք մեր այն գործընկերների հետ, որոնք անում են կարեւոր գործ՝ բարձրաձայնելով այսօրվա հրատապ խնդիրների մասին եւ ձգտելով լուծել դրանք: Մենք, նախորդ համաժողովների փորձը եւ ձեռք բերված գիտելիքը հաշվի առնելով, կշարունակենք քննարկումներ կազմակերպել աշխարհի տարբեր քաղաքներում»:

Բեռլինի Aurora Dialogues-ի բանախոսները հումանիտար գործիչներ են, գիտնականներ, բարերարներ եւ գործարարներ: Նրանք կանդրադառնան աշխարհում միգրացիոն ճգնաժամի իրավիճակին եւ այն դերին, որ պետական եւ ոչ պետական կառույցներն ունեն, ինչպես նաեւ՝ զարգացման ծրագրերին եւ փոփոխություն բերող լուծումներին:

««Ռոբերտ Բոշ» հիմնադրամն ուրախ է հյուրընկալել հումանիտար, քաղաքացիական հասարակության եւ գործարար առաջնորդներին Բեռլինում: Մեր նպատակն է ուղղել մեր ուշադրությունը եւ գործունեությունը Գերմանիայում եւ Եվրոպայում միգրացիայի, ինտեգրման եւ ներգրավման ոլորտներում: Հետեւաբար, մենք ակնկալում ենք ծանոթանալ տարբեր մոտեցումների, որոնք նպատակ ունեն գտնել լուծումներ եւ իրականացնել համապատասխան գործողություններ», - ավելացրեց դոկտոր-պրոֆեսոր Յոախիմ Ռոգալը՝ «Ռոբերտ Բոշ» հիմնադրամի նախագահը եւ գործադիր տնօրենը:

«Մեր գործընկերությունը եւ Բեռլինի Aurora Dialogues-ը կբերի յուրօրինակ փորձառություն եւ ներկայիս միգրացիոն ճգնաժամի լուծումներին ուղղված մոտեցումներ՝ հիմնված առավել կայուն եւ բազմակողմանի զարգացման ու ինտեգրացիայի քաղաքականության վրա: Ես կարծում եմ՝ սա կարեւոր քայլ է աշխարհի ուշադրությունը հումանիտար ճգնաժամի վրա բեւեռելու համար», - ասաց «Գլոբալ հեռանկարներ» նախաձեռնության հիմնադիր եւ գործադիր տնօերն Ինգրիդ Համը:

«Լայնախոհությունը, հարգանքը եւ հանդուժողականությունը մեր արժեհամակարգի կենտրոնում են: Այս արժեքները պետք է բարձր պահել, հատկապես, երբ բախվում ենք այնպիսի բարդ խնդիրների, ինչպիսիք են միգրացիան եւ ինտեգրացիան: Մենք մեր գործընկերոջ՝ «Ինտեգրացիայի եւ միգրացիայի գերմանական հիմնադրամների» Փորձագիտական խմբի հետ նպաստում ենք հանրային բանավեճի ծավալմանը եւ լավագույն փորձի ներդրմանը: Բեռլինի Aurora Dialogues-ն ի մի է բերում տարբեր ոլորտների մոտեցումներ՝ ուղղված այս բազմակողմանի խնդրին», - նշեց «Մերկատոր» հիմնադրամի գործադիր տնօրեն Վինֆրեդ Քնայփը:

«Ավրորա» մարդասիրական մրցանակի ոգուն հավատարիմ՝ Aurora Dialogues քննարկումների շարքը ներկայացնում է մարդկանց, որոնք իրականում և շարունակաբար աշխատում են ընդդեմ այսօրվա վայրագությունների, ինչպես նաև փորձում է նախանշել այնպիսի գաղափարներ, որոնք կարող են շոշափելի փոփոխություններ բերել: Քննարկումների երրորդ տարում Aurora Dialogues-ը խրախուսում է այնպիսի համագործակցությունները, որոնք հնարավոր կդարձնեն ուսումնասիրել անցյալից դասեր քաղելու, ներկայում գործելու եւ ավելի լավ ապագա կերտելու կարեւորությունը:

Բեռլինի Aurora Dialogues-ի ծրագրի, բանախոսների եւ կազմակերպիչների մասին ավելին՝ այստեղ:

«Ավրորա» մարդասիրական նախաձեռնության մասին

«Ավրորա» մարդասիրական նախաձեռնությունը, որն ստեղծվել է Հայոց ցեղասպանությունը վերապրողների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք եւ հույս պարգեւել նրանց, ովքեր մարդասիրական աջակցության խիստ կարիք ունեն, այսպիսով՝ շարունակել մարդասիրության շղթան աշխարհով մեկ: «Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տեւած Հայոց ցեղասպանության՝1915-1923թթ.) աջակցել մարդկանց, ովքեր վտանգելով իրենց կյանքը` կնպաստեն այնպիսի նախագծերի իրագործմանը, որոնք կբարելավեն առավել կարիքավոր եւ աղքատ մարդկանց կյանքը: Սա իրագործվում է նախաձեռնության տարբեր ծրագրերի օգնությամբ՝ «Ավրորա» մրցանակ, Aurora Dialogues քննարկումների շարք, «Ավրորա» մարդասիրության ցուցիչ, Երախտագիտության նախագծեր եւ 100 LIVES ծրագիր: «Ավրորա» մարդասիրական նախաձեռնությունը Վարդան Գրեգորյանի, Նուբար Աֆեյանի եւ Ռուբեն Վարդանյանի մարդասիրական ձեռնարկումն է, որոնց արդեն երկրորդ տարում միացել են մի քանի տասնյակ նվիրատուներ եւ գործընկերներ: Նախաձեռնությունն իր շուրջ է հրավիրում բոլորին, ովքեր ողջունում են նվիրվածությունը մեր համընդհանուր մարդկայնությանը:

Ավելին՝ www.auroraprize.com

«Ռոբերտ Բոշ» հիմնադրամի մասին

Robert Bosch Stiftung GmbH-ը Եվրոպայի ամենամեծ հիմնադրամներից մեկն է, որը կապված է մասնավոր ընկերության հետ: Իր բարեգործական աշխատանքում այն փորձում է լուծել սոցիալական խնդիրներն իրենց նախնական փուլում եւ զարգացնել օրինակելի լուծումների փորձը: Այս նպատակով այն զարգացնում եւ իրականացնում է սեփական նախագծեր: Բացի այդ, այն աջակցում է գործընկեր կազմակերպությունների նախաձեռնություններին, որոնք ուղղված են միեւնույն նպատակներին: «Ռոբերտ Բոշ» հիմնադրամն ակտիվ է առողջապահության, գիտության, սոցիալական, կրթության եւ միջազգային հարաբերությունների ոլորտներում: Ավելին, առաջիկա տարիներին հիմնադրամն ավելի ակտիվ կերպով ուղղակիորեն գործունեություն է ծավալելու երեք ուղղությամբ՝ միգրացիա, ինտեգրացիա եւ ներգրավում. սոցիալական համակեցություն Գերմանիայում եւ Եվրոպայում եւ կայուն բնակավայրեր: 1964թ. ի վեր «Ռոբերտ Բոշ» հիմնադրամը բարեգործական նախագծերի է ուղղել ավելի քան 1.4 միլիարդ եվրո:

Ավելին՝ www.bosch-stiftung.de

«Գլոբալ հեռանկար» նախաձեռնության մասին

«Գլոբալ հեռանկարներ» (Global perspectives) նախաձեռնության նպատակն է ակտիվացնել կայուն, հավասարակշռված եւ արդար գլոբալ զարգացման շուրջ դիսկուրսը՝ այսպիսով ակտիվորեն աջակցելով Գերմանիայի կողմից 2015թ. ՄԱԿ-ի կայուն զարգացման նպատակների իրականացմանը: 17 նպատակներից 11-ն առնչվում են միգրացիային եւ փախստականներին, ինչն առավել մեծ կարեւորություն է բերում Կայուն զարգացման նպատակների հանդեպ հանձնառությանը եւ ավելի լավ ու հավասարակշռված զարգացմանը:

Ավելին՝ www.gp-initiative.org

«Մերկատոր» հիմնադրամի մասին

«Մերկատոր» (Mercator) հիմնադրամը մասնավոր եւ անկախ հիմնադրամ է: Իր աշխատանքով այն նպատակ ունի հասարակությունը դարձնել առավել բաց, հանդուրժող եւ հավասար հնարավորություններով: Այս համատեքստում այն կենտրոնացած է Եվրոպան հզորացնելու վրա՝ նպաստելով կարիքավոր երեխաների եւ երիտասարդների, հատկապես՝ միգրանտների կրթական առաջընթացին, նվազեցնելով կլիմայական փոփոխությունները եւ զարգացնելով բնական եւ հումանիտար գիտությունները: Լինելով Գերմանիայի առաջատար հիմնադրամներից մեկը՝ «Մերկատորը» ակտիվ է ազգային եւ միջազգային մակարդակներում: Այն հատուկ ուշադրություն է դարձնում Գերմանիայի Ռուր շրջանի վրա, որը հիմնադիր ընտանիքի ծննդավայրն է, եւ այստեղ է գտնվում հիմնադրամի գլխավոր գրասենյակը: «Մերկատոր» հիմնադրամը կարեւորում է 2017-2018 թվականների եվրոպական միգրացիոն քաղաքականությունը:

Ավելին՝ www.stiftung-mercator.de

Գերմանիայում մեդիա հարցումների համար՝
Էլ. հասցե. [email protected]
Հեռ. +49 30 4081 7660

Բոլոր մեդիա հարցումների համար՝
Էլ. հասցե. [email protected] կամ [email protected]
Հեռ. +44 203 047 2315 կամ +374 60 700 800