Կարմիրգրքյան սև անգղը փրկության շանս ունի. Մանուկ Մանուկյան (տեսանյութ, լուսանկար)

«Շատ հազվադեպ տեսակի թռչուն է տեղափոխվել մեր՝ «Էնդեմիկ և վտանգված տեսակների պահպանություն» հիմնադրամի թռչունների փրկարարական կենտրոն»,- իր ֆեյսբուքյան էջում գրել է նշված հիմնադրամի ղեկավար, կենդանաբան Մանուկ Մանուկյանը և ներկայացրել մանրամասնություններ. «Երեկ Գեղարքունիքի մարզի Մարտունի քաղաքի առանձնատներից մեկի բակում հայտնաբերվել է Հայաստանի Կարմիր գիրքում գրանցված սև անգղ։
Թռչունը շատ թույլ է եղել և հայտնաբերողները զանգել, տեղեկացրել են այդ մասին մարզի Բնապահպանության և ընդերքի տեսչական մարմնի աշխատակիցներին, որոնք էլ իրենց հերթին անգղին տեղափոխել են Երևան»։
Իսկ հոկտեմբերի 27-ին, «Էնդեմիկ և վտանգված տեսակների պահպանություն» հիմնադրամի ղեկավար, կենդանաբան Մանուկ Մանուկյանը սև անգղի նախնական, վիզուալ զննում է անցկացրել։ Ըստ նրա․ «անգղն ունի աչքի վնասվածք, կապտուկներ թևերին, որոնք, հավանական է, ընկնելուց, տարբեր առարկաներին բախվելուց են առաջացել և լորձաթաղանթային օրգանների խնդիր։ Հավանական է թունավորում, կամ այլ հիվանդության հետևանք է»։
Մոտ օրերս մասնագետի, կենդանաբույժի կողմից ավելի մանրակրկիտ զննում կանկացվի, որ ավելի ստույգ ախտորոշում տրվի։

Մանուկ Մանուկյանը նշում է. «Սև անգղը պահպանվում է «Խոսրովի անտառ» արգելոցում, որտեղ կանոնավոր բնադրում է։ Անհրաժեշտ է հանրապետության սահմաններում, այդ թվում «Խոսրովի անտառ» արգելոցում բացահայտել և խստորեն պահպանել տեղադրված սև անգղի բնադրավայրերը»:
Տեսանյութերը՝ հղումով
https://www.facebook.com/manuk.manukyan.37/posts/pfbid02a9fnUhKTJWsiiGdwC5Le8KHBSJBWKHjv11L2PNwgutSrD3crEvh1ztXigKzJqXuxl