Արցախի Հանրապետությունը արդեն կերել են, հիմա հերթը Հայաստանի Հանրապետությանն է. Լևոն Հայրյան (տեսանյութ)

«Այստեղ հավաքված մարդիկ մտահոգ են իրենց ապագայի, իրենց կյանքի, իրենց սերունդների համար»,- Ֆրանսիայի դեսպանատան դիմաց լրագրողների հետ զրույցում ասաց «Հանուն Հադրութի» ՀԿ նախագահ Լևոն Հայրյանը՝ նշելով, որ վերջիններս, մեծամասամբ, 2020 թվականի Հայաստան տեղափոխվածներն են, որոնք չեն վերադարձել Արցախ և ակնառու կերպով զգացել են, թե ինչ ապագա է սպասում իրենց Հայաստանում։
Ինչպես հաղորդում է Panorama.am-ը, Հայաստանում Ֆրանսիայի դեսպանատան առաջ ակցիա իրականացնող և հումանիտար ապաստան խնդրող արցախցիների մասին խոսելով՝ Հայրյանը նշել է, որ վերջին երեք տարիների ընթացքում իրենց ներկայացրած ոչ մի պահանջ չի բավարարվել։
«Երեք տարի անընդհատ մեր բոլոր պահանջներին՝ թե իրավական, թե բնակարանային հարցերին դեմագոգիկ պատասխաններ էին տալիս, թե Արցախում ենք տուն տալու՝ բնակարանաշինությունից հետո։ Եվ այդ ապուշ քաղաքականության արդյունքում, կարծեմ, հարյուր ութսուն միլիարդից ավելի գումար են դրել Արցախում տներ կառուցելու համար։ Մեր որևէ պահանջ չի բավարարվել՝ գումարած էս վերջին խայտառակությունները։ Փախստականներին էլ մասերի են բաժանում, որպեսզի հեշտ լինի ու  ժողովուրդը չհավաքվի»,-ասաց նա։
ՀԿ նախագահի խոսքով, մարդիկ հավաքվել են՝ Ֆրանսիայի դեսպանատնից խնդրելու հումանիտար ապաստան, որովհետև Հայաստանում ապագան շատ մութ է՝ նույնիսկ քաղաքական առումով։
«Արցախի Հանրապետությունը արդեն կերել են, հիմա հերթը Հայաստանի Հանրապետությանն է։ Մեր կառավարությունը ամբողջությամբ հույսը դրել է Ռուսատանի վրա, ես դրա համար վախենում եմ արդեն ՀՀ ապագայից»,-ասաց նա։
Հայրյանի խոսքով, վերջին երեք տարում իրենք դիմել են ցանկացած կառույցի ու պաշտոնյայի, որոնք իրավասու են եղել զբաղվել իրենց հարցով.
«Հայաստանում փոքր ու մեծ տրամաչափի պաշտոնյա չի եղել, որ չհանդիպենք։ Հանդիպել ենք Մհեր Գրիգորյանի հետ, Սոցապ նախարարի հետ, ԱԳՆ-ում հանդիպում ենք ունեցել, Մարդու իրավունքների պաշտպանի մոտ, Արդարադատության նախարարի մոտ ևս. Ամեն տեղ հարցերը սղալել են… մի տեղ լեզու են ծամում, մի տեղ սղալում»։
Ակցիայի մասնակցի խոսքով, առաջին հարցը, որ պետք է լուծեն՝ փախստականի կարգավիճակ տալն է, որը չեն անում, սակայն որպես փախստական դիտարկում են. «Բնակարանային հարցերը չեն լուծում, նպաստները, որով պիտի յոլա գնայինք, կտրել են։ Հիմա ո՞նց պետք է լինի էս մարդկանց հարցերը։ Մենակ ուզում են Եվրոպայում խոսեն ու ծափեր ստանան։ Էս ապուշների մտքին մինչև հիմա մի բան կա ՝ մեզ վերադարձնել այնտեղ և ռեինտեգրացիա անել»։
Բացի Ֆրանսիայի դեսպանատնից, հավաքվածները դիմել են նաև Իտալիայի դեսպանատուն և պատրաստ են դիմել ԱՄՆ-ի դեսպանատուն։
«Ամենաճիշտը էն կլինի, որ Հայասատանի ղեկավարությոոնը խելքը գլուխը հավաքի, ու իմանա, որ առաջին, երկրորդ, երրորդ սորտի հայեր չկան»,-ասաց Հայրյանը։
Իրենց պահանջը ևս մեկ անգամ ներկայացնելով Ֆրանսիայի դեսպանությանը՝  արցախցիները ստացան հետևյալ պատասխանը. «Հավաքի մասին տեղյակ են, եթե դեսպանը էստեղ լինի, կամ ինչ-որ բան լինի, կարող են մոտենալ ձեզ, սպասեք»։
Մանրամասն՝ Panorama.am-ի տեսանյութում