Հայաստանի հավաքականը պարտվեց և գործնականում կորցրեց խմբից դուրս գալու հնարավորությունը

Լատվիա - Հայաստան հանդիպումը ավարտվեց 2:0 հաշվով, տանտերերի հաղթանակով: Հայաստանի ֆուտբոլի հավաքականը այդպիսով, կարելի է ասել, գործնականում կորցրեց խմբից ելնելու, Եվրո-2024-ի եզրափակիչ փուլին մասնակցելու հնարավորությունը: Իսկ Լատվիան 5 պարտությունից հետո, առաջին հաղթանակը տարավ, ըստ որում, գրեթե մի ամբողջ խաղակես հանդես գալով 10 հոգով (երկրորդ դեղին քարտն ստանալու համար մրցակցի կարևոր պաշտպաններից մեկը խաղադաշտից «դուրս հրավիրվեց»):
Վաղուց Հայաստանի ֆուտբոլի հավաքականը այսքան անատամ ու անօգնական տեսք չէր ունեցել: Մեր ֆուտբոլիստիներին հակառակ իմաստով «հաջողվեց» գրեթե անհնարինը: Նախ՝ 39-րդ րոպեին բաց թողեցին տանտերերի արագ հակագրոհը, որն ավարտվեց գոլով: Եվ հետո, երբ մրցակիցը մնացել էր 10 ֆուտբոլիստներով, Հայաստանի հավաքականը ևս մեկ գոլ բաց թողեց երկրորդ խաղակեսում: Չանչարևիչը խախտումով որսաց գնդակը տուգանային հրապարակի սահմաններից դուրս, նշանակվեց տուգանային, որը բերեց անկյունային հարվածի, իսկ այդ ստանդարտն էլ ավարտվեց լատվիացիների երկրորդ գոլով: 
Դրանից հետո Պետրակովն ավելի ուժեղացրեց կիսապաշտպանությունն ու հարձակման գիծը, բայց Հայաստանի հավաքականի գրեթե ոչ մի գրոհ նույնիսկ 100 տոկոսանոց գոլային պահի չվերածվեց: Այս ընտրափուլում մասնագետների բազմաթիվ դրվատական արձագանքներին արժանացած մեր թիմն ու խաղացողները նման էին իրենց թույլ ստվերին միայն: 
Ափսոս: Իսկ հաջողությունն այնքան մոտ էր թվում: Հայաստանի հավաքականին մնում է չհուսահատվել, խելքները գլուխները հավաքել և... «կրկին փորձել» հաջորդ մրցաշարում: Եթե իհարկե, ինչ-որ հրաշքով մերոնք չհաղթեն Խորվաթիային՝ մրցակցի խաղադաշտում, Ուելսին՝ Երևանում, իսկ մրցակիցներն էլ, հատկապես թուրքական թիմը և Ուելսը իրարահաջորդ պարտություններ կրեն: 
Լուսանկարը՝ armsport.am կայքից
Zham.am