Փաշինյանը ցանկանում է, որ սիգը թանկանա, սխա՛լ է, որ... էժան է

Եթե վաղը հանկարծ նկատեք, որ Երևանի տարբեր անկյուններում ու «ծակուծուկերում» կիսածածուկ վաճառվող սիգի գները «երկինք են թռել», հանկարծ չզարմանաք: Ձկնավաճառներն այդպիսով կատարած կլինեն Նիկոլ Փաշինյանի հերթական քմահաճույքը, այն է՝ թանկացնել սիգը: Առանց այն էլ այս կառավարության պատճառով սոցիալական խնդիրների մեջ ընկած մարդիկ մի սիգ էին էժան առնում, փաստորեն, դա էլ է շատ համարվում: Հնարավոր է, որ երբ սև ձկնկիթ ես ուտում, քեզ սկսում է անարդար թվալ այն, որ ինչ-ւր տեղ կան մարդիկ, որոնք հնարավորություն ունեն 1000 դրամով, օրինակ, 3 կամ 4 հատ կիսատանջված տեսք ունեցող սիգ(իկ) գնել: 
Ինչպես հաղորդում է Panorama.am-ը, կառավարության նիստում Նիկոլ Փաշինյանը հայտարարել է. «Մենք խնդիր ունենք Սևանա լճի ձկնային պաշարները գնահատելու և տարեկան քվոտաներ սահմանելու հետ կապված»:
Նա տեղեկացրել է, որ ավանդույթի համաձայն հանրապետության ակադեմիական շրջանակները գործադիրին տալիս են Սևանա լճում սիգի պաշարների մասին թվեր, որոնք իրատեսական չեն: Նա ասել է. «Մենք գործնականում տեսնում ենք, որ ոչ օրինական միջոցներով, բայց Սևանա լճի ձկնապաշարների օրինական ծավալներից տասն անգամ ավել  ձուկ է որսվում, բա որտեղից այդ ձուկը, եթե այդքան չկա: ...Քվոտաների և ճիշտ գնային քաղաքականությունը թույլ կտան, որ ձկնորսները՝ գուցե ավելի քիչ ձուկ որսալով նույնքան գումար վաստակեն: Կներեք՝ ես անկեղծ լինեմ, որը ոմանց դուր չի գա, բայց պետք է ասեմ, թե ինչո՞ւ պիտի սիգը մեզ մոտ լինի ամենաէժան գնային սեգմենտի մեջ, ըստ էության, հակառակը պետք է լինի»: 
Ձկնաբուծության հարցում թերևս փորձագիտական գիտելիքներ ունեցող Փաշինյանը նաև նշել է, թե երաշխավորված բնական միջավայրում մեծացած ձուկը պետք է էժան չլինի, ապա հավելել է, թե՝ շուկայում վաճառվող մյուս ձկների ֆիզիակական տեսքից էլ երևում է, որ «անառողջ բտած» են:
«Այն միջոցները, որը մենք Սևանա լճի ձկան վերարտադրության համար ծախսում ենք՝ մեզ համար չենք անում, ես անձամբ ոչ մի հետաքրքրություն չունեմ այդ ոլորտում: Այն անում ենք մարդկանց համար, որ այն դառնա արդյունաբերական ոլորտ և երկարաժամկետ ծառայի ՀՀ-ին և Գեղարքունիքի մարզի ժողովրդին և ձկնորսությամբ զբաղվող մեր հայրենակիցներին»,-հայտարարել է Փաշինյանը:
Միանգամայն հավանական է, որ նրա այս հայտարարությունից հետո, «ձկնորսությամբ զբաղվող մեր հայրենակիցները» սիգի գներն արհեստականորեն «օդ կթռցնեն»: 
Zham.am