Կոնստանտին Զատուլինը Նիկոլ Փաշինյանին դավաճան է անվանել

ՌԴ Պետդումայի պատգամավոր Կոնստանտին Զատուլինի կարծիքով Նիկոլ Փաշինյանը սխալ է իրեն պահում Լեռնային Ղարաբաղի բնակիչների հետ կապված հարցում:

«Говорит Москва» ռադիոկայանի եթերում Պետդումայի ԱՊՀ հարցերով  եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալը դատապարտել է Փաշինյանի գործողությունները։

«Դավաճանները երբ դավաճանում են, տրամաբանակա՞ն են իրենց պահվածքում, թե՞ ոչ։ Դավաճանների տեսանկյունից նրանք գործում են տրամաբանորեն։ Հարցն այն է, թե արդյոք հայ ժողովրդի և Հայաստանի շահերը համընկնում են այն մարդու՝ Նիկոլ Փաշինյանի շահերի հետ, ով այժմ ղեկավարում է ՀՀ-ն։

Նա փաստացի բախտի ողորմությանը հանձնեց Լեռնային Ղարաբաղի իր հայրենակիցներին։ Նրա ողջ հռետորաբանությունն անիմաստ է այն բանից հետո, երբ  2020 թվականից հետո եկավ այն եզրակացության, որ Լեռնային Ղարաբաղից պետք է ազատվել։ Նա միանգամայն գիտակցաբար հանձնում է Լեռնային Ղարաբաղը։ Սա դավաճանական տեսք ունի: Բայց Փաշինյանը ելք գտավ՝ մեղքը գցում է Ռուսաստանի վրա՝ ասելով, որ Ռուսաստանը պետք է զբաղվի Լեռնային Ղարաբաղով, ինքը դրա հետ կապ չունի։ Բայց մենք չպետք է թաքնվենք տխրահռչակ դավաճան Փաշինյանի դիրքորոշման հետևում, մենք պետք է պահպանենք մեր պատիվը», - ասել է Զատուլինը:

Zham.am