Կապանի օդանավակայանի վրա ադրբեջանցիների կողմից կրակելու դեպքի առթիվ սպանության փորձի հատկանիշներով քրեական վարույթ է նախաձեռնվել․ ՔԿ խոսնակ

Քննչական կոմիտեում նախաձեռնվել է քրեական վարույթ ադրբեջանցիների կողմից Կապանի «Սյունիք» օդանավակայանի վրա կրակելու դեպքի առթիվ։ Այս մասին Tert.am-ին փոխանցեց ՔԿ մամուլի խոսնակ Գոռ Աբրահամյանը։

Նա հայտնեց, որ դեպքի առթիվ քարեական վարույթ է նախաձեռնվել Քրեական օրենսգրքի 2 հոդվածով՝ սպանության փորձ, որը կատարվել է անձանց կյանքի համար վտանգավոր եղանակով, և ազգային, էթնիկ հայացքներով կամ թշնամանքի շարժառիթով գույքի ոչնչացում։

«Դեպքի վայրի զննություն է կատարվել, փորձաքննություններ են նշանակվել, նախաքննությունը շարունակվում է»,- հավելեց Աբրահամյանը։

Հիշեցնենք որ օգոստոսի 17-ին վարչապետ Նիկոլ Փաշինյանի՝ Կապան թռիչքից, օդանավակայանում շրջայցից ու կանոնավոր թռիչքներ սկսելու մասին հայտարարությունից հետո ադրբեջանական կողմից կրակել են շահագործման պատրաստ օդանավակայանի ուղղությամբ։

ԱԱԾ-ից հայտնել էին, որ ադրբեջանական կողմից անհայտ անձը ավտոմեքենայով եկել է օդանավակայանի հարակից տարածք, երեք կրակոց արձակել ու հեռացել, փամփուշտներից երկուսը վնասել են օդանավակայանի պատուհաններից մեկը և տանիքը։

Ադրբեջանական կողմը օդանավակայանի ուղղությամբ կրակել էր նաև հաջորդ օրը, ընդ որում՝ Հայաստանի պաշտոնյաների՝ վարչապետի աշխատակազմի ղեկավար Արայիկ Հարությունյանի ու Անվտանգության խորհրդի քարտուղար Արմեն Գրիգորյանի վայրէջքից առաջ։

Հավելենք նաև, որ եղանակային պայմանների պատճառով Երևան- Կապան երկու չվերթ հետաձգվել էր։