«Ես ուզում եմ բարություն փոխանցել, որպեսզի Հայաստանը հաղթի». Միշայի ցանկությունը և մրցույթի մանրամասները

«Մանկական Եվրատեսիլ 2017» երգի միջազգային մրցույթին Հայաստանը կներկայացնի Միշան իր «Բումերանգ» երգով: Մրցույթից առաջ հայաստանյան պատվիրակությունը լրագրողների հետ հանդիպում է ունեցել և պատասխանել մի քանի հարցերի:

Ասուլիսին ներկա էին Միշայի պրոդյուսեր Լիրա Քոչարյանը, «Եվրատեսիլի» հայաստանյան պատվիրակության ղեկավար Գոհար Գասպարյանը: Մինչ սկսելը Միշան մայրանալու կապակցությամբ ծաղիկներ նվիրեց Գոհար Գասպարյանին:

«Այս տարի մենք ավելի ոգևորված ենք, քանի որ կանոնների փոփոխություն է եղել, և յուրաքանչյուրս կարող ենք քվեարկել մեր մասնակցի օգտին»,- նշեց Գոհար Գասպարյանը:

Կազմակերպիչները որոշեցին մանրամասներ չհայտնել ելույթից, միայն նշեցին, որ Միշան բեմում միայնակ է լինելու. «Մենք չենք ուզում ավելորդ բաներ անել, միայն կասեմ՝ բեմում հեքիաթային մթնոլորտ է տիրելու»: Դե, իսկ Միշայի ցանկությունը մեկն է. «Ես ուզում եմ բարություն փոխանցել, որպեսզի Հայաստանը հաղթի»:

Մանրամասները՝ Zham.am-ի տեսանյութում: