Ալիևի թիմը, սկզբունքորեն, չի ցանկանում վերջ դնել այս հակամարտությանը․ Մարկելով․ Alphanews.am

Իլհամ Ալիևի թիմը, սկզբունքորեն, չի ցանկանում վերջ դնել ԼՂ հակամարտությանը, քանի որ Բաքուն չի լուծել իր ներքին խնդիրները. Ադրբեջանն, ինքնին, բավականին աղքատ երկիր է՝ ցածր կենսամակարդակով։ Alpha Newsroom-ի ուղիղ եթերում նման կարծիք է հայտնել ռուս քաղաքագետ Սերգեյ Մարկելովը: «Միգուցե ես ձեզ զարմացնեմ, բայց իմ կարծիքը կարտահայտեմ, թող մեր հեռուստադիտողն այն գնահատի: Ղարաբաղյան հակամարտությունը դիտարկող փորձագետներից շատերի մոտ տպավորություն է ստեղծվել, որ Իլհամ Ալիևի թիմը, սկզբունքորեն, չի ցանկանում վերջ դնել այս հակամարտությանը։

Դուք զարմանում եք, թե ինչու նա չի ցանկանում, որ այն ավարտվի: Ինչու՞ է այդպես: Որովհետև, երբ որևէ երկրի ղեկավարություն ցանկանում է վերջ դնել հակամարտությանը, նա անընդհատ խթանում է բանակցային գործընթացները, անընդհատ մեղմացնում է փոխադարձ հակամարտությունների ռեժիմները»,-ընդգծել է փորձագետը։

Մարկելովը մանրամասնել է. «Այսինքն, նրանք նմանատիպ լուծումների չեն գնում։ Կամ սրացումներ են լինում կամ ռազմական բախումներ։ Իրերն իրենց անուններով կոչենք, դրանք քաղաքական պատմության մեջ բնութագրում ունեն: Այն, ինչ հիմա կատարվում է արցախցիների հետ՝ կենցաղային պայմանների խախտում, տրանսպորտ, տեղաշարժ, բուժօգնություն, այս ամենը պատմաքաղաքական տերմինով կոչվում է ցեղասպանություն։ Կարելի է, իհարկե, խոսել ձեւակերպման, բովանդակության մասին, բայց սա, իրականում, մի ազգի ուժի ցուցադրությունն է մյուսի նկատմամբ, եւ սա միանգամայն ակնհայտ է։

Եվ ահա ևս մեկ քար այս գործընթացի այգում՝ ադրբեջանական կողմն ամեն ինչ անում է, որ այս հակամարտությունը չսառեցվի։ Ինչո՞ւ։ Քանի որ Ադրբեջանը պետք է իր ներքին քաղաքականությունը կառուցի ինչ-որ բանի վրա։ Հավատացե՛ք, միայն թվում է, թե երկիրը տնտեսապես զարգացած է, այս ամբողջ նավթարդյունաբերությունը, Կասպից ծովը… »:

Ըստ քաղաքագետի՝ ով եղել է Բաքվում, գիտի, որ երբ քայլում ես գլխավոր փողոցով, իսկապես, հիշեցնում է Արաբական Միացյալ Էմիրությունները, բայց 100 մետր քայլում ես այն կողմ, եւ այն արդեն բավականին հեռու է Էմիրություններից։ «Բաքվում ընդամենը երեք քառակուսի կիլոմետր լավ տեղ կա, ու վե՛րջ։ Սա ասում եմ, քանի որ Բաքուն չի լուծել իր ներքին խնդիրները, Ադրբեջանն, ինքնին, բավականին աղքատ երկիր է՝ բնակչության ցածր կենսամակարդակով։ Եվ Ալիևի այս բոլոր տարօրինակությունները, մրցավազքը, դրանով է պայմանավորված, այսինքն՝ նրա թիմին պատերազմ է պետք։ Պե՛տք է, շատ է պետք հակամարտություն։ Նրանք անընդհատ իրենց շարքային քաղաքացիներին, որոնք ունեն հսկայական թվով խնդիրներ, Արցախի գաղափարն են նետում՝ որպես պատմական մեծ առաքելություն:

Երկրորդ՝ ինչո՞ւ Ադրբեջանը չի ցանկանում դադարեցնել հակամարտությունը։ Հասկացե՛ք, սա շատ կարևոր է, դուք կարող եք ապացուցել Հայաստանի և Ադրբեջանի միջև այս հակամարտության ակնհայտությունը, որքան ուզում եք, կարող եք առաջնորդվել քաղաքական «արդարություն» բառով, բայց ո՞ւմ կողմն է արդարությունը։ Բոլորը հասկանում են, որ այս հակամարտության արդարությունը Հայաստանի կողմն է։ Ուստի, Ադրբեջանում բոլորը վաղուց հաշվարկել և հասկացել են, որ ինչ արդյունք էլ լինի, Արցախի՝ որպես հայկական տարածքի կարգավիճակի պահպանումը, որը պատմական և տնտեսական արմատներ ունի Հայաստանի հետ, կթուլացնի Ադրբեջանի ղեկավարի թիմին»։

«Այսօր ոչ ոք չի ուզում թույլ լինել, ուստի ամեն ինչ անելու են: Արցախին հարվածելը ժողովրդի ուշադրությունը շեղում է և, իհարկե, արցախյան թեմայի բարձրաձայնումն ու հասարակությանը կենտրոնացնելն այդ փաստի վրա, նշանակում է՝ մենք դեռ ցույց կտանք մեր ուժը։ Եվ երրորդը, եթե նրանք ցանկանային լուծել հակամարտությունը, նկատի ունեմ ադրբեջանական կողմին, ապա հավատացե՛ք, դա ցույցկցուցադրեին։ Այսինքն, պայմանական ասված, մարդը դուրս է գալիս և մեկ Շվեյցարիայում, հետո Գերմանիայում, ապա Ամերիկայում կազմակերպվող բոլոր այդ հավաքույթների ժամանակ հրապարակում է իր կարգավորման ծրագիրը։ Ոչ ոք ադրբեջանական ծրագիր չի տեսել, միայն խոսակցություններ ։ Եվ սա կոչվում է քաղաքական դեմագոգիա։ Եվ այս քաղաքական դեմագոգիան հերթական գործիքն է, որը ցույց է տալիս, որ ծրագիր չկա, քանի որ ցանկացած ծրագիր այսօր կբախվի «արդարություն» բառին։ Ալիեւի թիմը գիտի, որ սա անարդար հակամարտություն է հայ ժողովրդի տեսանկյունից, եւ հետեւաբար, Ադրբեջանը այն մինչեւ վերջ ձգելու է»,- ընդգծել է քաղաքագետը։