Թուրքիայում երրորդ օրն է՝ հանգցնում են բնական հրդեհը Քեմեր ամառանոցային շրջանում

Ավիացիան եւ ցամաքային ուժերը հինգշաբթի առավոտյան լրիվ ծավալով վերսկսել են անտառային հրդեհի մարման աշխատանքը թուրքական Քեմեր ամառանոցային քաղաքում, որը գտնվում է Միջերկրական ծովի ափին։ Հրդեհի օջախները չի հաջողվում մարել երրորդ օրը, կրակը ոչնչացրել է ավելի քան 200 հեկտար անտառ, տեղեկացրել է TRT հեռուստաալիքը։

Հրդեհը մարելու համար, ցամաքային տեխնիկայի հետ միասին, չորեքշաբթի ներգրավվել են նաեւ 10 ինքնաթիռներ եւ 27 ուղղաթիներ։ Մութն ընկնելուն պես հրդեհի մարմամբ սկսել են զբաղվել գիշերային տեսանելիության սարքերով զինված ուղղաթիռները։ Հրդեհի մարումը դժվարանում է, քանի որ ջերմաստիճանը հասնում է 40-ի, ուժեղ քամին եւ դժվար հասանելի տեղանքը ցամաքային տեխնիկայի համար դժվարացնում են իրավիճակը։ Հրդեհը Քեմերի շրջանում չի հասել հյուրանոցներին, դրանք աշխատում են սովորական ռեժիմով։ Բնական հրդեհները Թուրքիայում չորեքշաբթի մարում էին նաեւ հյուսիսարեւմտյան Իզմիրում, Մանիսում եւ Չանաքկալեում, ինչպես նաեւ Բեյքոզ շրջանում (Ստամբուլի ասիական հատված)։ Տեղի իշխանությունների տվյալներով՝ դրանք վերցվել են հսկողության տակ։ Թուրքիայի շատ շրջաններում, այդ թվում հարավում, վերջին օրերին շոգ եղանակ է։

Ջերմաչափը տեղ-տեղ բարձր է Ցելսիուսի 40 աստիճանից։ Ստամբուլում եւ Իզմիրում, որտեղ ջերմաստիճանը հասել է 44 աստիճանի, բազմամյա ռեկորդներ են սահմանվել։ Թուրքիայի հյուսիս-արեւմուտքում, արեւմուտքում եւ կենտրոնական մասերում հինգշաբթի օրվանից, օդերեւութաբանների կանխատեսումներով, շոգին փոխարինելու կգա զովացումը մոտ 10 աստիճանով, որը կուղեկցվի անձրեւներով։