Կառավարությունը լուծարեց Երևանի հայ-ամերիկյան «Էրեբունի» պետական բժշկական քոլեջը

Կառավարությունն իր այսօրվա՝ հուլիսի 13-ի նիստում գույք հետ վերցնելու, ԿԳՄՍ նախարարության «Երևանի հայ-ամերիկյան «Էրեբունի» պետական բժշկական քոլեջ» պետական ոչ առևտրային կազմակերպությունը լուծարելու մասին որոշում կայացրեց:

Որոշման նախագծի ընդունման անհրաժեշտությունը պայմանավորված է պետական ուսումնական հաստատությունների և դրանցում իրականացվող ծրագրերի տեղաբաշխման ռացիոնալացմամբ: Նախագծի անհրաժեշտությունը պայմանավորված է Երևանում գործող բժշկական ուղղվածության միջին մասնագիտական կրթական ծրագրերի իրականացնող ուսումնական հաստատությունների կառավարման և ծախսարդյունավետության բարձրացմամբ, ռեսուրսների համակենտրոնացմամբ:

Մասնավորապես՝ «Երևանի հայ-ամերիկյան «Էրեբունի» պետական բժշկական քոլեջը» լուծարելը հնարավորություն է տալիս օպտիմալացնել օգտագործվող տարածքները և ուսումնանյութական բազան, թեթեւացնել պետության բեռը:

Երևանում գործում են պետական 4  և ոչ պետական հավատարմագրված 7 ուսումնական հաստատություններ, որոնցում ուսուցանվում են առողջապահական ոլորտի մասնագիտություններ: «Երևանի հայ-ամերիկյան «Էրեբունի» պետական բժշկական քոլեջի» հարևանությամբ գործում է նաև «Էրեբունի»  բժշկական ակադեմիա» հիմնադրամը, որը 2022 թվականին ստացել է ինստիտուցիոնալ հավատարմագրում և ուսուցանում է գրեթե նույն մասնագիտությունները:

Երևանի հայ-ամերիկյան «Էրեբունի» պետական բժշկական քոլեջի ընդունելությունը տարեց-տարի նվազում է և ներկայումս ուսանում է 420 ուսանող, որից 140-ը ավարտում են 2022-2023 ուսումնական տարում:

Անհրաժեշտ է նշել, որ հարևանությամբ գտնվող ««Էրեբունի» բժշկական ակադեմիա» հիրմնադրամի շենքային և ուսումնալաբորատոր պայմանները էականորեն ավելի բարենպաստ են մասնագիտական կրթության կազմակերպման տեսանկյունից:

«Երևանի հայ-ամերիկյան «Էրեբունի» պետական բժշկական քոլեջ» ՊՈԱԿ-ի ուսանողների ուսումնառության շարունակումը նույն պայմաններով (անվճար/վճարի նույն չափով) նախատեսվում է կազմակերպել «Էրեբունի»  բժշկական ակադեմիա» հիրմնադրամում (սանողի ցանկությունը հաշվի առնելով) կամ այլ պետական կամ ոչ պետական հավատարմագրված ուսումնական հաստատություններում, իսկ աշխատակիցների մեծ մասը իրենց աշխատանքը կշարունակեն «Էրեբունի»  բժշկական ակադեմիա» հիմնադրամում: