Կիբերհանցագործները գումար շորթելու նոր մեթոդ ունեն` Նիկոլ Փաշինյանի նկարով

Համացանցում կիբերհանցագործները նոր ձևով են փորձում գումարներ շորթել։ Տևական ժամանակ է, ինչ համացանցում տարածված են կեղծ գովազդային հայտարարություններ՝ հայտնի մարդկանց լուսանկարներով, այդ թվում նաև ՀՀ վարչապետ Նիկոլ Փաշինյանի լուսանկարով։

Oragir.News-ի հետ զրույցում մեդիա փորձագետ Սամվել Մարտիրոսյանը ասել է, որ այս ամենը ունի մեկ տարվա վաղեմություն։ «Անհնարին է դրանք խափանել, որովհետև անընդհատ տարբեր էջերից են անում, տարբեր ոճի, որակի, տեսքտի։ Միակ խափանման միջոցը մարդկանց գլուխներն են»,-ասաց մեդիա փորձագետը։ Սամվել Մարտիրոսյանը նշում է, որ մարդկանց վստահությունը շահելու համար տարբեր հայտնի մարդիկ են ընտրվում, տարբեր տեսանյութեր են պատրաստում և սա անընդհատ փոփոխվող բան է։

«Գրեթե անհնարին է նման կեղծ էջերին գումար տրամադրելուց հետո դրանք հետ ստանալ, որովհետև ձեռք բերված գումարները դուրս են բերվում երկրից կրիպտոարժույթով։ Հույս ունենալ, որ գումար տալուց հետո հետ կստանաս, գրեթե անհնարին է»,- նշեց Մարտիրոսյանը։

Oragir.News-ը փորձեց դատախազությունից ճշտել, թե արդյոք տեղյակ են այս դեպքի մասին և ինչ քայլեր են ձեռնարկում այս առթիվ, սակայն դատախազությունից ասացին, որ պետք է գրավոր հարցում ուղարկել։ Հարցման պատասխանը ունենալու դեպքում այն կհրապարակենք։