Երևանում տրանսպորտով մեկանգամյա ուղևորությունը կարող է արժենալ 200 դրամ Տեսանյութ

Երևանի փոխքաղաքապետ Վահե Նիկոյանի կարծիքով, այժմ նախագծվող մայրաքաղաքի նոր տրանսպորտային ցանցը մեկ միասնական սակագին չի ունենա։
Տրանսպորտային ոլորտի բարեփոխումները համակարգող պաշտոնյան «Ազատությանն» ասաց, թե տարբեր սակագների պարագայում, այնուամենայնիվ, հնարավոր է տրանսպորտից պարբերաբար օգտվողների համար պահպանել գործող սակագինը․ - «Որոնք ձեռք կբերեն պայմանական պլաստիկ տոմսային քարտեր, որոնք լիցքավորված կլինեն առնվազն իքս քանակի տոմսեր, իրենց համար կլինի դա մատչելի։ Եվ հնարավոր է, որ իրենց համար չփոխվի տոմսի գինը․․․ ինչ-որ տարբերակներում: Հաշվարկները ցույց կտան, բայց հնարավոր ա, որ 100-ը մնա: Ես իրատեսական եմ դա համարում: Բայց մի ուրիշ խավի համար, ով որ էսօր որոշել ա տրանսպորտով, վաղը՝ իր մեքենայով, և ինքը ցանկություն չունի գնա էդ տոմսերից առնի, այլ ուզում ա մտնի ավտոբուսում տոմս առնի, իրա համար կարող ա կրկնակի թանկ լինել»:

Երևանում տոմսային համակարգը, ըստ փոխքաղաքապետի, դառնալու է ինչպես արտասահմանում՝ էլեկտրոնային, և այդ պարագայում որոշակի սոցալական խմբերի համար զեղչեր կսահմանվեն․ - «Տուրիստ եղել ենք ուրիշ քաղաքներում: Մեր համար լրիվ ուրիշ գներ ա գործում, երբ որ դու չես օգտվում էս, էս, էո տարբերակներից: Այսինքն, տարբերակներ կլինեն, որի մեջ, հնարավոր ա, որ 100 դրամը գործի»:

Թե որն է լինելու հասարակական տրանսպորտի ամենաբարձր սակագինը, Նիկոյանը դժվարացավ ասել: Դա, ըստ նրա, դեռ պետք է հաշվարկել․ - «Միասին կհաշվարկենք: Ոչ մեկ չի պատրաստվում սակագինը մենակով հաշվարկի: Միասին, երբ որ բոլոր չափորոշիչները հստակ կլինեն, կհաշվարկենք»:

Ինչ վերաբերում է սակագնի փոփոխության հետևանքով հանրության շրջանում հնարավոր բողոքի ալիքին, փոխքաղաքապետ Նիկոյանը ասաց, որ հատուկ հարցումներ են պատվիրել և պարզել, որ բնակչությանն ավելի շատ հուզում է որոկյալ տրանսպորտային համակարգ ունենալու հարցը, քան սակագնի բարձրացումը։

Հիշեցնեմ՝ 2013 թվականին տրանսպորտի սակագնի 50 դրամով բարձրացումը մեծ բողոքի ալիք բարձրացրեց երևանցիների շրջանում, ինչից հետո բարձրացումը չեղարկվեց։

«Ցանկացած բարեփոխում կարա բողոք առաջացնի՝ նույնիսկ եթե դա և՛ ֆինանսապես, և՛ ոչ-ֆինանսապես օգուտ ա մեր բնակչությանը: Կարևորը, պետք ա լայնամասշտաբ իրազեկենք, որ այս բարեփոխումները արվում են բնակիչների համար: Այլ նպատակ չկա»:

Բողոքներից խուսափելու համար քաղաքապետարանը նաև լայն քննարկումներ է անցկացնելու։ Բոլոր քայլերի մասին առաջիկայում խորհրդակցելու են մասնագետների և հանրության հետ հանդիպումների միջոցով։ Նիկոյանի փոխանցմամբ՝ վերջնական սակագները վերջին փուլում կորոշվեն:

2016 թվականի դեկտեմբերին Երևանի քաղաքապետարանը տրանսպորտային համակարգը կազմակերպելու նպատակով միջազգային խորհրդատու կազմակերպություն ներգրավվեց։ Մոտ 11 ամիս աշխատելուց հետո օրերս խորհրդատուն ներկայացրել է Երևանի երթուղային ցանցի առաջարկը։ Այն Երևանի տրանսպորտային ոլորտի բարեփոխումները համակարգող Նիկոյանի աշխատասենյակում օրերս են փակցրել, դեռ չեն էլ հասցրել քննարկել քաղաքապետարանում: Բայց առաջին տպավորությամբ փոխքաղաքապետը այն արդյունավետ է գնահատում։ Նոր ցանցով նախատեսվում է, որ տրանսպորտի թիվը կրկնակի կկրճատվի, իսկ «Գազել»-ներին կփոխարինեն մեծ ավտոբուսները․ - «18 մետրանոց ավտոբուսներ․․․ ես հիմա տեղատարողությունը կդժվարանամ ասել․․․ Եթե չեմ սխալվում, դրանք 180 տեղանոց ավտոբուսներ են»:

Կրճատվելու է նաև ցանցը․ բարեփոխումներից հետո Ա կետից Բ կետ հասնելու համար հնարավոր է, որ մի քանի տրանսպորտ փոխելու անհրաժեշտություն լինի։ Փոխվելու են մի շարք կանգառների տեղերը, նոր կանգառներ են կառուցվելու։

Նիկոյանը ասաց, որ նախատեսում են գրեթե բոլոր կանգառներում էլեկտրոնային չվացուցակներ տեղադրել։

Նոր տրանսպորտային ցանցի ներդրման և սպասարկման համար մոտ 100 միլիոն դոլար է անհրաժեշտ։ Փորձելու են միջազգային փորձառու ընկերություն ներգրավվել, եթե չստացվի՝ վարկ կվերցնեն և համայնքային ընկերություն կստեղծեն։

Երևանի փոխքաղաքապետը ասաց, որ մոտ մեկ տարվա ընթացքում փորձելու են այս ամենը իրականություն դարձնել: Այս պահին բոլոր հաշվարկները նախնական են։

Ազատություն