ԱԱԾ աշխատակիցները եւս կկարողանան օգտվել մատչելի եւ արտոնյալ հիփոթեքային վարկավորման ծրագրից

Կառավարությունն իր այսօրվա՝ հունիսի 8-ի նիստում փոփոխություն կատարեց իր նախկին որոշումներից մեկում, որը միտված է ազգային անվտանգության մարմինների ծառայողների բնակարանային պայմանների բարելավման անհրաժեշտությամբ:

ԱԱԾ տնօրենի տեղակալ Տիգրան Հարությունյանը՝ ներկայացնելով նախագիծը, նշեց, որ նախագծով առաջարկվում է գործող որոշմամբ սահմանված բնակարանի կամ բնակելի տան ձեռք բերման կամ կառուցման դեպքում պետական աջակցության ծրագրի նպատակային շահառու դարձնել նաեւ ԱԱԾ մարմինների զինծառայողներին, ինչը կնպաստի ազգային անվտանգության մարմինները որակյալ և բանիմաց կադրերով համալրելու գործընթացին եւ կավելացնի ծառայության գրավչությունը:

«Նախագծի ընդունման դեպքում սկսած 2024 թվականից յուրաքանչյուր տարի ազգային անվտանգության մարմինների 40 ծառայող հնարավորություն կունենա օգտվելու պետական աջակցությամբ իրականացվող մատչելի եւ արտոնյալ պայմաններով երկարաժամկետ հիփոթեքային վարկավորման նպատակային ծրագրից:

Նախագծի ընդունումից հետո ՀՀ պետական բյուջեից մոտավոր հաշվարկով տարեկան կպահանջվի 157 մլն դրամ»,-ասաց ԱԱԾ փոխտնօրենը: