Արցախում ուժեղ քամու ուղեկցությամբ տեղացած անձրևը նյութական վնասների պատճառ է դարձել

Արցախի Հանրապետության տարածքում տեղացած հորդառատ անձրևի և քամու ուժգնացման հետևանքով կոտրվել են ծառեր, շինությունից պոկված թիթեղները և ապակիները վնասել են ավտոմեքենաներ, ինչպես նաև էլեկտրալարեր։

Մայիսի 29-ին ժամը 18:38-ին, ոստիկանության ՃՈ ՕԿԿ տեսուչից ճգնաժամային կառավարման կենտրոն ահազանգ է ստացվել, որ քամու և հորդառատ անձրևի հետևանքով, Ստեփանակերտ-Շոշ ավտոճանապարհի տարբեր հատվածներում ծառեր են կոտրվել և խոչնդոտում են երթևությանը` դարձնելով այն միակողմանի։ Հաղորդագրությունը փոխանցվել է <<Արցախուղի>> ընկերությանը և իրականացվել է ճանապարհի մաքրման աշխատանքներ:

Քամու ուժգնացման և հորդառատ անձրևից Նաբերեժնայա փողոցում շինությունից պոկված թիթեղները և ապակիները վնասել են մոտակայքում կայանված թվով 6 տրանսպորտային միջոց։ Հաղորդագրությունը փոխանցվել է ոստիկանության հերթապահ մաս և «Սանմաքրում» ընկերությանը։

Մեկ այյ դեպք գրանցվել է ժամը 19:06-ին։ Օրբելի 11 հասցեում ծառը կոտրվել և ընկել է բարձր լարում ունեցող էլեկտրալարերի վրա։ Դեպքի մասին տեղեկացվել է «Արցախէներգո» ընկերությանը։ Բերքաձոր-Այգեստան ավտոճանապարհին ուժեղ քամուց ծառը կոտրվել և ընկել է ճանապարհի եզրին։ Բոլոր դեպքերով ԱԻ պետական ծառայության ճգնաժամային կառավարման կենտրոնի հերթապահ օպերատորները արձագանքել և անմիջապես տեղեկացրել են պատասխանատու ընկերություններին` բնածին աղետի հետևանքները մեղմացնելու նպատակով: