Եթե ՀՀ-ում տեղի ունենա իշխանափոխություն, ապա Արցախն Ադրբեջանի կազմում թողնելու հարցը կմնա օդում կախված. քաղաքագետ

Միջանցք հասկացողությունը աշխարհում ընդունված տարբերակ է, եւ երբ խոսում են հյուսիս-հարավ միջանցք, արեւելք-արեւմուտք միջանցք, միջանցքի տակ հասկանում են հենց այդպիսի միջանցք, բայց քանի որ Փաշինյանը փորձում է հերոսական կարգավիճակով հանդես գալ, եւ ցույց տալ, որ հանձնում է Արցախը, որ պաշտպանի Սյունիքը, ծիծաղի առարկա է դարձել բոլորի համար: Այս մասին NEWS.am-ի հետ զրույցում նշեց քաղաքագետ Երվանդ Բոզոյանը՝ անդրադառնալով Մոսկվայի հանդիպման ժամանակ Ալիեւի հայտարարությանը, թե «Զանգեզուրի միջանցքի» հարցում կա ռուսների համաձայնությունը, ինչին հակադրվեց Փաշինյանը:

«Բնականաբար, Ալիեւը չի հայտարարում, որ սա իմ տարածքն է: Սովորաբար տարածքները վերափոխվում են քաղաքական տրամաբանության արդյունքում: Եթե Փաշինյանը համաձայնել է Արցախը հանձնել Ադրբեջանին եւ հայ հասարակությունը լուռ հետեւելու է դրան, ապա վաղը ոչ ոք թող չզարմանա, որ «Զանգեզուրի միջանցք» հասկացողությունը կդառնա իրականություն, եւ ոչ մեկը չի կարող դրան հակադրվել: Նույնիսկ Իրանը իրեն արդեն այլ կերպ կպահի, որովհետեւ այսպիսի երկրի ու ժողովրդի հետ ոչ ոք չի ուզենա դաշնակցային հարաբերությունների մեջ մտնել»,-ասաց նա:

Բողոյանի խոսքով, եթե Հայաստանում տեղի ունենա մեծ ընդվզում եւ իշխանափոխություն, ապա Արցախն Ադրբեջանի կազմում թողնելու հարցը կմնա օդում կախված. «Եթե Արցախը Ադրբեջանի կազմում մնալու պրոցեսը գնաց, իսկ այդ դեպքում Արցախը վերանալու է, դատարկվելու է, ապա Ռուսաստանը զրկվելու է Ադրբեջանի նկատմամբ լծակներից: Այդ դեպքում Ադրբեջանի կարգավիճակը կտրուկ փոխվելու է եւ նրա հետ հաշվի են նստելու եւ ռուսները, եւ իրանցիները, եւ մյուսները: Դրանից հետո հաջորդ պահանջը լինելու է արդեն Զանգեզուրի հետ կապված, ադրբեջանցիներին Հայաստան բերելու հետ կապված: Դա լինելու է տրամաբանական ու արդարացի, որովհետեւ այսպիսի ժողովրդի հետ ոչ ոք հաշվի չի նստի»,-ընդգծեց նա:

***

Կարծում եմ՝ այդ հանդիպումն ավելի շատ ձեւական բնույթ ուներ, կարծում եմ՝ Փաշինյանն իր համար արդեն որոշել է, որ այդ պայմանավորվածություններն արդեն ձեռք է բերել արեւմտյան հարթակում եւ զուտ ձեւականորեն շարունակում է հանդիպել նաեւ մոսկովյան հարթակներում, քանի որ դրա ավանդույթը կա: Այս մասին NEWS.am-ի հետ զրույցում նշեց քաղաքագետ Երվանդ Բոզոյանը՝ անդրադառնալով նախօրեին Մոսկվայում Հայաստանի, Ադրբեջանի եւ ՌԴ-ի ղեկավարների հանդիպմանը:

«Այդ իմաստով ես մեծ աժիոտաժ չեմ տեսնում ռուսական հարթակում, որովհետեւ եթե նկատել եք, Վաշինգտոնում հանդիպումը 4 օր տեւեց, Բրյուսելում 4 ժամ տեւեց, իսկ Մոսկվայում՝ ընդամենը 20 րոպե»,-ասաց Բոզոյանը՝ կարծիք հայտնելով, որ ռուսական կողմին արդեն դուրս են մղել գործընթացից:

«Չի բացառվում, որ ինչ-որ պահի ռուսները ինչ-որ քայլի դիմեն, բայց ընդհանուր առմամբ այդպես է: Դուք տեսեք, թե ինչպես է իրեն պահում Փաշինյանը ռուսական պետական գործիչների հետ, ինչ պահվածք է դրսեւորում: Արդեն պրակտիկորեն հայտարարել է, որ Հայաստանը պատրաստ է դուրս գալ ՀԱՊԿ-ից: Այս ամենը հենց դրա մասին է: մարդ, որը պատրաստ է պրոռուսական հարթակում համաձայնության գալ Ադրբեջանի հետ, նման հայտարարություններով հանդես չէր գա»,-ընդգծեց նա:

Քաղաքագետը նկատեց, որ եթե Փաշինյանը 2022-ի հոկտեմբերին Պրահայում ընդունել է, որ Արցախն Ադրբեջանի մաս է, դա նշանակում է՝ Լաչինի միջանցքն էլ է Ադրբեջանի մաս, իսկ այդ դեպքում լեգիտիմ է Ադրբեջանի կողմից անցակետի տեղադրումը. «Հետեւաբար, Փաշինյանի կողմից Բաքվին ուղղված մեղադրանքները կեղծ եւ ձեւական բնույթ են կրում եւ հայ հանրության համար են: Այլ խնդիր է, որ մինչեւ Ալիեւի երեկվա հայտարարությունը Հայաստանի ամբողջ քաղաքական դաշտը նույնպես չէր կարողանում հասկանալ, թե ինչու է Ադրբեջանը անցակետ բացում Լաչինի միջանցքում, մեղադրում էին ռուսներին եւ այլն: Սա ցույց է տալիս մեր քաղաքական վերնախավի ցածր որակը»,-ընդգծեց Բոզոյանը՝ հավելելով, որ Փաշինյանը փորձում է Լաչինի միջանցքի հետ կապված ամբողջ պատմությունը բարդել ռուսների վրա: