Անցակետի տեղադրումը խաթարում է վստահության ձևավորման ջանքերը. Բլինկենը զրուցել է Ալիևի հետ

ԱՄՆ պետքարտուղար Էնթոնի Բլինկենը զրուցել է Ադրբեջանի նախագահ Իլհամ Ալիևի հետ և ընդգծել հայ–ադրբեջանական խաղաղ բանակցությունների կարևորությունը։ Տեղեկությունը հայտնում է ԱՄՆ պետքարտուղարությունը։

Հեռախոսազրույցի ընթացքում Բլինկենը խոստացել է, որ ԱՄՆ–ն մշտական աջակցություն կցուցաբերի այդ գործընթացին։

«Նա նաև հայտնել է Միացյալ Նահանգների խոր մտահոգությունը Ադրբեջանի կողմից Լաչինի միջանցքում անցակետի տեղադրման կապակցությամբ` նշելով, որ այն խաթարում է խաղաղ գործընթացում վստահության ամրապնդմանն ուղղված ջանքերը։ Բլինկենն ընդգծել է առևտրային և մասնավոր տրանսպորտային միջոցների համար Լաչինի միջանցքի շուտափույթ բացման կարևորությունը»,– ասված է հաղորդագրությունում:

Հիշեցնենք` 2022–ի դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել էին Արցախը Հայաստանին կապող Ստեփանակերտ-Գորիս մայրուղին, որտեղից հեռացան մայիսի 28-ին։

Ապրիլի 23-ին Ադրբեջանն անցակետ տեղադրեց Լաչինի ճանապարհին` այն ամբողջությամբ իր վերահսկողության տակ առնելով։

Աղբյուր՝ «Սպուտնիկ Արմենիա»