Դանակահարություններ Երևանում. բժիշկները պայքարում են երիտասարդների կյանքի համար

Այսօր՝ ապրիլի 18-ին, դանակահարություններ են տեղի ունեցել Երևանում: Ժամը 13:30-ի սահմաններում «Սլավմեդ» բժշկական կենտրոնից ՀՀ Ներքին գործերի նախարարության Ոստիկանության Արաբկիրի բաժին ահազանգ է ստացվել, որ «աջ կողքի թափանցող կտրած ծակած վերք» և «պարանոցի առաջնային հատվածի կտրած ծակած վերք» վնասվածքներով իրենց մոտ է տեղափոխվել մի քաղաքացի: Մինչ բժիշկները պայքարում էին վիրավորի կյանքի համար, ոստիկանները պարզել են, որ նա Երևանի բնակիչ 27-ամյա Արսեն Մ-ն է ու մինչ ոստիկանները հիվանդանոցում էին, «Նաիրի» բժշկական կենտրոնից ոստիկանության Արաբկիրի բաժին ահազանգ է ստացվել, որ իրենց մոտ բուժօգնության է տեղափոխվել «ձախ գոտկային շրջանի կտրած ծակած, արնահոսող վերք» ախտորոշմամբ մի քաղաքացի: Ինչպես հայտնում է ֆոտոլրագրող Գագիկ Շամշյանը, ոստիկաններն օպերատիվ տվյաներով պարզել են, որ վիրավորը Երևանի բնակիչ 43-ամյա Կարեն Կ-ն է:

Պարզվել է, որ այսօր ժամը 12:50-ի սահմաններում «Սլավմեդ» բժշկական կենտրոն տեղափոխված Արսեն Մ-ն, Երևանի բնակիչ 32-ամյա Տիգրան Կ-ն և ևս մեկ հոգի, ում ինքնությունը պարզվում է, Արսեն Մ-ի կողմից օգտագործվող ավտոմեքենայով գնացել են Բաղրամյան 40 հասցեում գտնվող Հայաստանի Ամերիկյան համալսարանի մոտ, որտեղ Mercedes GLS և Toyota Corolla մակնիշի ավտոմեքենաներով նշված վայր են եկել Երևանի բնակիչ 29-ամյա Ռուբեն Գ-ն, «Նաիրի» բժշկական կենտրոն տեղափոխված Կարեն Կ-ն և ինքնությունները դեռևս չպարզված 2 այլ անձինք: