Ալեն Սիմոնյանի՝ քաղաքացու վրա թքելու դեպքի առթիվ իրավական որեւէ գործընթաց տեղի չի ունեցել

Կարեն Մկրտչյանի հայտարարության հիման վրա, ըստ որի Ազգային ժողովի նախագահ Ալեն Սիմոնյանը թքել է իր վրա իրեն դավաճան կոչելուց հետո, իրավապահ մարմիններում որեւէ գործընթաց դեռեւս չի նախաձեռնվել։ Այս մասին NEWS.am-ին հայտնեց միջադեպի մասնակից Կարեն Մկրտչյանը:

Նա նշեց, որ որեւէ իրավական գործընթացի մասին իրեն չեն հայտնել, ինքը հաղորդում չի ներկայացրել, կարծում է, որ ժողովրդավարական երկրում իրավապահ մարինները կզբաղվեն այս հարցով:

Հիշեցնենք, որ ապրիլի 3-ին, քաղաքացի Կարեն Մկրտչյանը ֆեյսբուքյան էջում հայտնել էր, որ Ազգային ժողովի նախագահ Ալեն Սիմոնյանը հրահանգել է իր թիկնազորի աշխատակիցներին բռնել իրեն եւ թքել է իր այն բանից հետո, երբ ինքն Ալեն Սիմոնյանին դավաճան է անվանել։ Ալեն Սիմոնյանն ավելի ուշ ֆեյսբուքյան գրառմամբ չէր հերքել կատարվածը, օրեր անց էլ մեկ այլ գրառմամբ ներողությու էր խնդրել կատարավածի համար ՀՀ քաղաքացիներից։

««Ականջներիդ օղ արեք», որ ձեր լկտիությունն անպատասխան չի մնալու ՀՀ օրինական իշխանությանը վիրավորելուն լինելու է օրինական պատասխան»,- նշել էր Սիմոնյանը:

Կարեն Մկրտչյանի փաստաբան Սերգեյ Հարությունյանը կարծում է, որ դեպքի առնչությամբ պետք է հարուցվի վարույթ խուլիգանության եւ պաշտոնեական դիրքի սահմանազանցման հատկանիշներով։

Նշենք, որ «Իրազեկ քաղաքացիների միավորումը» գլխավոր դատախազին հանցագործության հաղորդում է ներկայացրել՝ կապված Ազգային ժողովի նախագահ Ալեն Սիմոնյանի կողմից քաղաքացու դեմքին թքելու մասին չհերքված լուրի և ոստիկանության կողմից այդ քաղաքացուն առերևույթ ապօրինի բերման ենթարկելու դեպքի մասով