Դավիթ Գյուրջինյանը Բրյուսով է գալիս համալսարանը լուծարելու համար․ դասախոս

Դավիթ Գյուրջինյանը Բրյուսովի անվան պետական համալսարանի ռեկտորի պաշտոնակատար է նշանակվել բուհը կազմալուծելու համար։ Այս մասին այսօր՝ մարտի 15-ին, լրագրողների հետ զրույցում ասաց համալսարանի համաշխարհային գրականության եւ մշակույթի ամբիոնի վարիչ Նատալյա Խաչատրյանը։

«Վերջին հինգ տարիների ընթացքում համալսրանում եղել է մեծ առաջընթաց։ Ցավալի է, որ մի քանի հոգի մեր աշխատակազմից, անձնական խնդիրներից ելնելով, պախարակում են մեր արած ամբողջ աշխատանքը։ Եթե կար երկու թեկնածու, եթե հենց ԿԳՄՍ նախարարն է հայտարարում, որ անցել է Կարինե Հարությունյանը, սակայն հետո պարտված մարդուն նշանակում են ռեկտորի պաշտոնակատար, ուրեմն՝ ապօրինություն է։ Սա ապտակ է մեզ համար, մեր ուսանողների։ Մեզ համար, միեւնույն է՝ ով կլինի ռեկտորը, մեզ համար կարեւոր է, որ բուհը մնա եւ շարունակի ճանապարհը, որը սկսել ենք տիկին Հարությունյանի հետ։ Ես պարոն Գյուրջինյանի հետ որեւէ խնդիր չունեմ, բայց չեմ պատկերացնում մի մարդու, որին մեկ անգամ մերժել են եւ ինքնասիրությունը թույլ է տալիս գալ այդ համալսարան, նշանակում է՝ ինքը հանձնարարությամբ է գալիս՝ լուծարել համալսարանը, միացնել բուհերը»,- նշեց Նատալյա Խաչատրյանը։

Հիշեցնենք` դեկտեմբերի 9–ին Վալերի Բրյուսովի անվան պետական համալսարանում ռեկտորի ընտրություն տեղի ունեցավ. գործող ռեկտոր Կարինե Հարությունյանը վերընտրվեց։ Ընտրությանը մասնակցում էին 2 թեկնածու` Կարինե Հարությունյանը և Լեզվի կոմիտեի նախագահ Դավիթ Գյուրջինյանը:

Դեկտեմբերի 22–ին հայտնի դարձավ, որ Պետական վերահսկողության ծառայությունը Վալերի Բրյուսովի անվան պետական համալսարանում մի շարք խախտումներ է հայտնաբերել և տեղեկանքներ ներկայացրել ՀՀ գլխավոր դատախազություն հետագա ընթացքն ապահովելու համար։ Մասնավորապես, ըստ ՊՎԾ–ի, բուհի ռեկտոր Կարինե Հարությունյանն ինքն իրեն հատկացրել էր 5,44 մլն դրամի չափով պարգևատրում և լրավճար։

Մարտի 14-ին արդարադատության նախարար Գրիգոր Մինասյանի հրամանով հաստատվեց բուհի ժամանակավոր խորհրդի կազմը։ Խորհուրդը 3 անդամ ունի՝ ԿԳՄՍ նախարար Ժաննա Անդրեասյանը, արդարադատության նախարարի տեղակալ Արմենուհի Հարությունյանն ու վարչապետի աշխատակազմի ղեկավարի տեղակալ Զարուհի Մաթևոսյանը։

Աղբյուր՝ News.am